Dili) Mudansa – Ministeriu Edukasaun Juventude no Desportu (MEJD) tane aas média nia servisu hodi fó apresiasaun ba Jornalista Destakadu iha área Edukasaun liu husi distribuisaun sertifikadu apresiasaun molok oitavu governu nia mandatu remata.
Ministru Edukasaun Juventude no Desportu (MEJD) Armindo Maia informa, apresiasaun ne’e tradisaun uluk kedas bainhira Ministru ida husik nia knaar iha Ministeriu ida sempre iha agradesimentu ka apresiasaun ba parseiru sira liuliu ba média sira.
Nia haktuir, la presiza esplika funsaun média nian, maibé média hanesan Bus tula pasajeiru ba mai depois lori fila fali no jornalista maka lori informasaun husi Governu divulga iha baze no lori fali informasaun kona-ba komunidade nia difikuldade husi baze hato’o fali mai Govenu hodi buka dalan atu rezolve.
“Imi jornalista maka lori informasaun ba mai, média iha Oi-oin ne’ebé servisu hamutuk entre governu nian, tanba ne’e maka MEJD rekoñesimentu no apresiasaun ba média sira nia servisu hamutuk ho governu liu husi distribuisaun sertifikadu ba Jornalista,” Dehan Ministru MEJD Armindo Maia ba Jornalista iha edifísiu MEJD Vila Verde Dili, Sesta 02/06/2023.
Nia esplika, Ema hotu hatene iha Nasaun hotu liuliu iha Nasaun demokrátiku ida ne’e média nia papél importante tebes tanba Timor-Leste Asia ida ne’ebé Liberdade Imprensa aas tebes Estadu no governu tau importánsia ba média Liberdade hato’o informasaun ho lolos no analiza mós informasaun iha baze.
“Ami sira kaer ukun, durante ha’u-nia mandatu servisu hamutuk ho média la’o di’ak, tan ne’e Hau ho Vise Ministru MEJD lori MEJD nia naran, no mós lori dirijenti sira seluk iha Ministeriu ida ne’e hato’o agradese wain ba servisu hamutuk ne’ebé la’o di’ak hodi divulga informasaun husi Ministeriu ba baze no mós hudi baze mai ami.” Nia salienta.
Nia relata, fiar katak jornalista sira nia servisu hamutuk ne’e ba oin ho IX Governu se mak asumi fali knaar ida ne’e Nia (Ministru) la hatene, maibé espera katak kooperasaun ida ne’e la’o di’ak nafatin.
“Hau nia votus susesu ba Media ida-idak no individualmente ba jornalista bele hala’o knaar ho di’ak hodi serbí ba povu ida ne’e, ami serbí ba profesór no estudante sira no ita hotu serbí ba povu maibé funsaun mak diferensiál.” Armindo deklara.
MEJD nafatin sura mós ho servisu média nia liuliu Jornalista sira ne’ebé destakadu iha área Edukasaun tanba ne’e MEJD distribui sertifikadu ba jornalista sira husi média maka hanesan,
Media Mudansa (MD), Radiu Televisaun Timor-Leste Emprezariu Públiku (RTTL.EP), Tatoli.IP, Televisaun Edukasaun (TVE), Suara Timor Lorosa’e ( STL), Jornal Independente, Timor Post (TP) no Media Esperansa, Sertifikadu refere entrega direita husi Ministru Edukasaun Juventude no Desportu (MEJD).
Jornalista : Delfina Borges
Editór : Orlando Magno
