- (Dili) Mudansa – Komisaun Nasional Elisaun (CNE sigla Portugés) submete ona rezultadu akta apuramentu Nasional Provizoriu ba iha Tribunal Rekursu (TR).
Prezidente CNE José Agostinho Belo hateten, Servisu CNE hotu ona, tanba laiha reklamasaun ka rekursu ruma husi Parpol sira.
“Ohin CNE submete rezultadu ona akta apuramentu Nasional Provizoriu ba iha Tribunal Rekursu nune’e Tribunal Rekursu analiza hodi deklara sai rezultadu lolos ba públiku.” Dehan Prezidente CNE José Agostinho Belo ba jornalista iha TR Kaikoli Dili, 01/06/2023.
Prezidente José esplika, tempu legál, liu tiha ona servisu hotu la’o di’ak ho transparénsia no sira simu rezultadu ida ne’e ho di’ak.
“Tenki liu husi Tribunal Rekursu halo validasaun kona ba prosesu tomak nia prazu oras 72 ka lalais liu konforme desizaun Tribunal.” Nia subliña.
Nia afirma, Prosesu Eleisaun hotu ona lori mai iha Tribunal, ida ne’e sira nia servisu ona, tanba CNE nia servisu hotu ona.
“Se observadór no partidus sira iha kritiKa ruma ba ita karik, presiza hadi’a tanba ita la’os perfeitu liu, maibé hatudu ona servisu ho responsabilidade.” nia hakotu.
Jornalista : Delfina Borges.
Editór : Orlando Magno
