(Dili) Mudansa – Servisu Mígrasaun Timor-Leste (TL) deside bandu sidadaun Repúblika Indonézia hamutuk na’in-13 atu tama Timor-Leste, tanba viola Lei númeru 11/2017, kona-ba Imigrasaun no Aziliu TL.
Diretora Jerál Servisu Migrasaun (DGSM), Timor-Leste, Inspetora Xefi Polísia Adelaide da Rosa informa, antes ne’e sidadaun Indonezia na’in-13 mai vizita Timor-Leste ho vistu turista, maibé Komandu Munisípiu Viqueque ho Baucau halo identifikasaun ba sidadaun hirak ne’e hala’o fali atividade negósiu.
“Ema hirak ne’e mai ho pasaporte komún, kontra lei Imigrasaun no Azílu tanba sira utiliza vistu turista hodi hala’o atividade negósiu, entaun sira labele tama Timor-Leste mínimu tinan rua, maibé ita aplika desizaun másimu tinan tolu, bandu sira labele tama TL,” dehan Adelaide ba jornalista iha Edifisiu Ministeriu Interior, Vila-Verde Dili, Kinta, 01/06/2023.
Nia informa, tuir lei Imigrasaun no Azíliu, sidadaun estranjeiru kuandu uza vistu turista, labele hala’o atividade negósiu iha rai laran, tanba kontra lei no bainhira sira kontra mak estadu sei prega koima ba sira.
“Ita-nia lei bazeia ba sira nia konsiénsia, se sira hakarak selu, entaun sei selu tuir artigu 143 ne’e, mínimu $200.00 no másimu $1000.000 dolar,” katak nia.
Adelaide afirma, Servisu Imigrasaun dadaun konklui ona prosesu investigasaun ba sidadaun indonézia na’in 13, no iha prosesu ida ne’e SM la identifika katak ema sira ne’e obriga husi ema seluk, ou kazu tráfiku umanu ninian, maibé sira mai ho sira-nia konsiénsia rasik, hodi hala’o atividade negósiu.
Maibé, iha parte seluk servisu Imigrasaun mós deteta ema na’in 13 ne’e, utiliza motorizada 13, ne’ebé fornese husi sidadaun timoroan, no sira aluga motorizada hirak ne’e ho presu husi $100.00 to’o $150.00 dolar kada fulan.
“Entaun prosesu investigasaun ita konklui ona, no ita sei halo koordenasaun ho embaixada indonézia ninian, adidu servisu imigrasaun husi Indonézia iha Timor-Leste, nune’e ita bele halo abandona voluntáriu ba sidadaun hirak ne’e liu husi postu integradu Batugade,” afirma nia.
Nia esplika, bainhira mak atu deporta sidadaun hirak ne’e fila ba indonézia, ida-ne’e depende ba prosesu Koordenasaun, se karik prosesu ne’e Imeditu ka lalais ne’e di’ak liután, atu nune’e labele prejudika ba estadu tanba ema sira ne’e kuandu hela nafatin iha ne’e mak estadu tenke fó han fó hemu no tenke halo tratamentu dignu ba sira.
Jornalista : Julião da Silva
Editór : Orlando Magno
