(Dili) Mudansa – Timor Oan ida ho naran inisiál FFV husi munisípiu Kovalima Postu Administrativu Fatumea suku Beluli Leten aldeia Beluli Kraik hetan tiru husi sidadaun indonézia iha fronteira entre Indonesia ho Timor-Leste área Fatuk metan postu Fatumea.
Tuir informasaun ne’ebé Media mudansa asesu katat, vítima FFV horiseik dadeer-saan tuku 07:35 sai husi uma ba haree animál (karau) besik liu iha área fronteira entre Timor-Leste ho Indonezia.
Hafoin vítima halibur hotu ninia karau iha diresaun Fatuk Metan derrepente sidadaun husi indonézia ka área Lamak Reen mosu mai ho atributu oioin mak hanesan Kilat anin, katana, no mós rama ambon inklui atributu seluk.
Ho nune’e vítima FFV halai husi fatin ne’e tanba sidadaun indonézia besik 25, na’in 7 maka uza kilat anin maibé atributu hirak ne’e bele hakotu ema nia vida no mós hakmatek animál.
Iha momentu ne’e vítima halai kuaze metro 8 de’it hetan tiru husi sidadaun indonézia iha parte ain loos maski hetan ona kanek maibé vítima obriga an kontinua esforsu hodi halai sees husi fatin ameasa ba subar iha fatin seguru hodi kontaktu ba família sira iha Beluli Kraik.
Aleinde ne’e komunidade Beluli kr’ik hato’o kedas ba iha parte seguransa UPF no mós hato’o ona ba komandu munisípiu Kovalima inklui autoridade lokál iha área refere.
Husi informasaun ne’e Komandu Jeral PNTL mós simu ona relatóriu husi komandante munisípiu Kovalima katak iha sidadaun Kovalima nia ida husi postu Administrativu Fatumea bainhira ba toos no haree animál mak ema balu tiru nia uza kilat anin (senampan)
“Ema ne’ebé tiru sidadaun Fatumea ne’e Deskonfia ema indonézia entaun ita orienta ona Unidade Patrollamentu Fronteira (UPF) no mós komandu munisípiu Kovalima hodi halo movimentu no prosesu ne’e kontinua la’o,” dehan Komanda Jeral PNTL Komisariu Jeral Henrique da Costa ba Jornalista iha salaun enkontru Komandu Jeral Kaikoli Dili, 31/05/2023.
Nia afirma, Ema ne’ebé hela iha parte sorin mós dala ruma sira família fetosaan umane dala ruma mós maun alin entaun ida ne’e maka sai hanesan obstákulu ida maibé parte seguransa nafatin orienta membru sira iha fronteira hodi asegura situasaun.
“Situasaun sira hanesan ne’e ita nafatin komunika ho ofisiál ligasaun PPOLRI nian iha Timor, nune’e nia mós hatene hodi informa ba sira nia superiór parte seguransa nian iha Indonesia,” Komisariu Jeral hakotu.
Jornalista : Ekipa MediaMudansa
Editór : Orlando Magno
