(Dili) Mudansa – Partidu Congresso Nacionál de Reconstrução de Timor (CNRT) ladún satisfeitu ho atendimentu husi Sekretariadu Tékniku Administrasaun Eleitoral (STAE) no Komisaun Nasionál ba Eleisaun sira (CNE) durante iha eleisaun Parlamentar no kontajen votus Eleisaun Parlamentár 2023.
Sekretáriu Jerál Partidu CNRT Francisco Kalbuadi Lai hatete, tuir observasaun ne’ebé CNRT halo iha eleisaun parlamentár, sidadaun barak la konsege ezerse sira nia diretu votu, tanba iha sentru votasaun balun, boletín de votu menus.
“Iha Centros de votasoens balun, laiha boletín de votus, nune’e obriga atu sidadaun barak maka la ezerse sira nia direitu ba votu: Nune’e mós iha Centros de votasaun balun. iha territóriu nasionál. brigadas sira obriga sidadaun sira fila ba uma tanba oras liu ona, katak liu 3h lokraik,”dehan Kalbuadi liu husi konferénsia imprensa iha Sede Partidu CNRT Bairro dos Grilhos, 30/05/2023.
Aleinde iha mós sentru votasaun balun, brigadas sira la fó akta apuramentu inisiál ba fiskais partidu polítiku sira; no mós mosu fallansu sistema ba kontajen votus iha apuramentu munisipál, ne’ebé hatudu falta transparénsia, profisionalizmu no boa-fé husi STAE.
Iha mós fallansu balun maka, bainhira verifika tiha aktas apuramentu munisipál no nasionál husi STAE no CNE, hetan diferensa entre modelu akta husi fiskais partidu polítiku ho aktas husi STAE no CNE, ne’ebé hatama ba sistema, inklui mós STAE la entrega dokumentu kompletu atu CNE bele halo validasaun ba kontajen votu sira.
Ho Nune’e partidu CNRT, rekomenda ba STAE atu bele Garante transparénsia ho lolos ba apuramentu rezultadu. nune’e mós tenke hato’o ba CNE aktas eleitorál hotu husi apuramentu nasionál, munisipál no sentru votasaun.
Husu mós atu fó akta apuramentu ba fiskais partidu polítiku sira nian no informasaun fundamentu CNE hodi garante transparénsia no profisionalizmu, iha sentru votasaun, no apuramentu munisipál ho nasionál.
“Ba CNE atu asegura supervizaun no kontrolu ida di’ak, hodi garante efisiénsia no efikásia iha prosesu eleitorál hotu,”dehan nia.
Fatin hanesan, Reprezentante parte legál partidu CNRT, Carmelita Moniz konsidera, iha eleisaun parlamentár tinan ne’e, mosu irregularidade balun, ne’ebé ke hamosu diferensa de votu ne’ebé atribui bá partidu polítiku sira iha sentru votasaun balun iha territóriu nasionál, tanba partidu CNRT rasik iha tabulasaun ne’ebé mai husi servisu fiskais partidu nian liuhosi halibur akta sira husi sentru votasaun tomak.
Ho ida ne’e, partidu CNRT tenke halo konfirmasaun ho akta inisiál ka akta husi sentru votasaun ne’ebé CNRT iha ne’ebé bolu akta modelu C, fiskais sira simu iha sentru votasaun sira, hodi halo konfirmasaun ho akta modelu C ne’ebé STAE foti hodi tau bá akta modelu B.
hodi hatama bá iha sistema tabulasaun no CNRT husu bá CNE atribui akta sira ne’e hodi halo análize hodi haree Diskrepánsia maibé CNE fó de’it akta B no la fó akta C ne’ebé fiskais sira simu hodi entrega bá partidu iha tabulasaun nasionál.
“Lolos CNRT iha direitu tomak atu halo reklamasaun, maibé antes halo reklamasaun ita tenke halo konfirmasaun entre akta rua ne’e, ida-ne’ebé mak sai nu’udár akta auténtiku, no infelizmente ami labele hetan akta modelu C husi CNE,”hatete nia.
Tan ne’e molok halo reklamasaun CNRT tenke halo uluk lai konfirmasaun akta C husi CNE no partidu CNRT nian maibe bainhira la fo, infelizmente CNRT sei la halo reklamasaun hodi ezije direitu.
Jornalista : Julião da Silva
Editor : Orlando Magno
