(Dili) Mudansa – Partidu Demokratiku (PD) deside aprezenta ona karta ba Partidu Congresso Nacionál dé Reconstrução dé Timor (CNRT) atu bele avansa ba formasaun governu da sia (IX).
Hafoin aprezenta tiha karta ba partidu CNRT, Sekretariu Jeral PD António da Conceição “Kalohan” informa, karta ne’ebé PD aprezenta ne’e sentimentu saudasaun ida ba partidu CNRT hodi haree posibilidade ba formasaun governu foun.
“Ohin ha’u mós lori kedas ona ami nia karta ne’ebé atu hato’o ba CNRT hodi aprezenta ami nia saudasoens no espresa sentimentu ida ne’ebé ami hanoin karik posibilidade bele la’o hamutuk ba oin,” dehan sekretáriu Jeral PD Kalohan iha Sede Partidu CNRT, Bairro dos Grilhos tersa 30/05/2023.
Sekretáriu Jeral Partidu CNRT Francisco Kalbuadi Lai deside lori estrutura partidu CNRT nian hodi hato’o ksolok boot ba Partidu Demokrátiku ne’ebé ho inisiativa hasoru malu ho partidu CNRT.
“Kona-ba partidu CNRT ho PD nia aliadu ne’e, la’os foin eziste maibé antes ne’e eziste tiha ona,” Kalbuadi deklara.
Enkuantu tuir rezultadu votasaun provizóriu ne’ebé fó sai husi Sekretariadu Tekniku Administrasaun Eleitoral (STAE) no mós Komisaun Nasional ba Eleisaun sira (CNE) katak partidu hirak ne’ebé sei liu ona barreira ne’e maka, Partidu CNRT ho kadeira 31, FRETILIN ho kadeira 19, PD kadeira 6, KHUNTO kadeira 5, PLP kadeira 4.
Jornalista : Julião da Silva
Editór : Orlando Magno
