(Dili) Mudansa – Sekretáriu Estadu Formasaun Profisionál no Empregu (SEFOPE) preokupa ho Timor oan balu ne’ebé mete problema bainhira ba servisu iha estranjeiru tanba ida-idak haree de’it sira nia kór ka organizasaun arte marsiais.
SEFOPE preokupa asuntu ne’e tanba Kada semana Joven Timoroan halo despedida ho Governu liu husi SEFOPE no família sira, antes ba serbisu iha ema nia rai.
Ho ida ne’e, Sekretáriu Estadu SEFOPE, Alarico do Rosário informa, joven sira ba serbisu iha ema nia rai, maski tuir organizasaun Arte marsiais la hanesan maibé nia husu nu’udar Timor oan tenke haree malu hanesan maun alin rasik iha ema nia rai.
“Timor oan haree malu hanesan maun alin, tanba organizasaun nia objetivu atu salva an (bela diri), bainhira hasoru animál fuik iha dalan kloot atu prevene an, tanba la tempu ona atu kria problema,” dehan Sekretáriu Estadu SEFOPE Alarico ba jornalista sira iha salaun Timor Lodge, Sesta,16/06/2023.
Nia akresenta, ba serbisu iha ema nia rai maka ema na’in-2 husi organizasaun la hanesan serbisu iha fatin ida, maski organizasaun ketaketak maibé tenke nafatin haree malu no hadomi malu hanesan família rasik.
“Serbisu iha fatin ida, nu’udar Timor oan haree malu hanesan maun alin, tenke asegura malu, ita la bele lori buat sira ne’e ba kahur iha ema nia rai, tuir organizasaun saida de’it ne’e direitu ema ida-idak nian, maibé tenke uza ho didi’ak,” Nia subliña.
Nia hateten, ba serbisu iha estranjeiru nu’udar sidadaun ba rai ida ne’e, tenke tane aas no nasaun RDTL tanba futuru Timor iha Joven nia liman.
“Timor rai bele ki’ik ne’e ita nian, la lori ema nia rai atu troka ita-nia rai, la lori ema nia kultura atu troka ita-nia kultura, maibé ita Timor oan duni mak tane aas ita rai no valoriza ita-nia rai no kultura,” nia hakotu.
Jornalista : Defina Borges
Editór : Orlando Magno
