(Dili) Mudansa – Diretor Ezekutivu United Nation Mission in Cosovo (UNMIC) Filipe da Costa informa, sistema ai-han hahú husi natar laran no transporta mai iha armazenamentu halo prosesamentu distribuisaun to’o konsumu maibe situasaun mal nutrisaun iha Timor sei aas.
Diretór Ezekutivu UNMIC Filipe da Costa hato’o asuntu ne’e iha Workshop ne’ebé organiza husi Organizasaun Nasaun Unidus iha Timor Leste (ONU) hamutuk ho Ministeriu Agrikultura no Peska (MAP) ho tema “Hametin Sistema Ai-han Nutrietivu iha Timor-Leste”
“Ho situasaun mal nutrisaun iha Timor-Leste aas tebes tanba 2° lugár iha mundu nune’e mós labarik sira nia tinan lima mai kra’ik 47 % mak rais badak, objetivu dahuluk rekomenda ba Governu foun mai bele implementa ka investe di’adi’ak ba sistema ai-han ne’e hodi fornese ba povu ho seguru,” Filipe deklara.

Nia relata, implementa plataforma iha tinan 2021-2023 fulan hirak nia laran, atu haree filafali sistema ai-han ne’ebé la’o dadaun ne’e no progresu no problema to’o iha ne’ebé, nune’e prepara fali lista rekomendasaun foun ida dahuluk rekomenda ba governu foun mai kontinua investe sistema ai-han.
“Ita-nia situasaun iha Timor ema ne’ebé moris iha seguransa ai-han atinji 36% ida ne’e moris iha situasaun seguransa ai-han no barak mak sei moris iha inseguransa ai-han, liuliu sira ne’ebé aguda ne’e hamutuk 300 míl,” Nia subliña.
Filipe haktuir, Iha 2019 Sekretariu Jeral ONU lansa plataforma ida kona-ba Dialogu sistema ai-han Timor Leste adere kedas ba diálogu ida ne’e dezde tinan 2021.
Iha fatin hanesan Diretora Nasional MAP Maria Odete Ceu argumenta, aktividade ida ne’e iha tinan 2021 Timor-Leste ajuda husi ONU rejista hanesan membru Estadu ba iha transformasaun sistema seguransa ai-han.
“Transformasaun sistema seguransa ai-han katak, atu haree siklu ne’ebé hahú husi kuda, kolekta, distribui no transporta to’o ita han maibé tenke hadi’a nia kritéria transformasaun ai-han, haree ema sira fa’an modo no sei leba ne’e hotu seidauk tama kategoria,”Nia hakotu.
Jornalista : Delfina Borges
Editór : Orlando Magno