(Dili) Mudansa – Prezidente Repúblika (PR) José Manuel Ramos Horta liu husi Gabinete Sosiedade Sivíl no Apoiu Sosiál (SSAS), apoia kadeira roda bá portadór defisiénsia, Elizabeth Soares iha suku Beloi, Munisípiu Ataúru.
Tuir komunikadu imprensa ne’ebé média mudansa asesu husi Gabinete Prezidensia Repúblika katak, ho apoiu solidariedade ne’ebé Prezidente oferese, mak família husi defisiente ne’e mós deklara sente haksolok ho apoiu ne’ebé iha.
Amélia Soares, nu’udar inan ba defisiénsia Elisabeth Soares de Oliveira, hatete sira sente agradese ba tulun ne’ebé oferese husi Prezidénsia Repúblika no mós kadeira roda.
“Nu’udár inan, ha’u sente haksolok tebes no obrigadu tanba Prezidente Repúblika Horta bele oferese kadeira roda mai ha’u nia oan feto Elizabet Soares de Oliveira ne’ebé oras ne’e tinan 30 ona,”Dehan nia.
Antes ne’e, família sempre aprezenta kondisaun ne’ebé defisiénsia Elizabeth enfrenta ba entidade balun atu bele fó apoiu kadeira roda, maibé laiha ida mak tau matan.
Amélia haktuir katak, dadaun ne’e sira hela iha Aldeia Usu Bemasu, Suku Beloi no sira la iha kbiit atu sosa kadeira roda, hodi difikulta asesu Elisabeth Soares hodi asesu ba servisu saúde.
Reprezentante benefisiáriu husi suku Bikeli no Beloi, nu’udar no Xefe Juventude, Pastór Andre Soares mós agradese ba Prezidénsia Republika ne’ebé mak apoia nesesidade bázika no materiál desportiva ba iha Aldeia Iliana Suku Bikeli no Beloi.
“Reprezenta povu no juventude, ha’u fó obrigadu ba Prezidente Repúblika, hadomi tebes povu doben, ami nia apoiu orasaun nafatin Nia to’o nia ukun remata. Ami agradese tanba bele apoiu ami. Husu mós atu hare infraestrutura bázika hanesan be moos bakomunidade,’’ tenik Pastór Andre Soares.
Komunidade sira mós husu atu kontinua apoiu atividade juventude, hodi kontribui ba dezenvolvimentu nasionál.
Jornalista : Julião da Silva
Editor : Orlando Magno
