(Dili) Mudansa – Sua Eminensia Dom Virgilio Cardeal do Carmo da Silva.SDB informa, lori uma kreda no sarani tomak ne’ebé ohin selebra festa Corpo de Deus iha ne’e fó parabéns ba partidu maioria ne’ebé atu kaer ukun ba tinan 5 mai no Paraben ba Governu foun partidu Maioria forma ona atu ukun.
“Ita reza ba ukun na’in sira hanesan ohin proseisaun tuir dalan temi ita-nia Governante sira liuliu sira ne’ebé atu kaer ukun ho ita-nia orasaun ba governu foun atu ukun hanesan Maromak ukun ho fuan ida ne’ebé hatene rona povu nia halerik povu nia terus mizeria to’o ohin loron,” Dehan Dom Virgilio Cardeal ba jornalista sira iha Lecidere Dili kinta 08/06/2023.
Cardeal akresenta, Timor ukun an tinan XXI ona fatin barak seidauk goza buat ida dezde Timor-Leste hetan Independensia to’o ohin loron.
“Liberdade ida ne’e iha nesesidades bázika, área rurais barak estrada seidauk di’ak, bee mós sei laiha, eletrisidade mós laiha buat sira ne’e ita hein Governu foun liuliu hanesan reforma sira ne’ebé durante kampaña ita rona liafuan furak sira ne’e hotu agora tempu hatudu ba povu buat hirak ne’e iha tinan 5 mai.”Tenik Sua Eminensia.
Ne’e la’os buat foun, maibé povu hein buat ne’ebé sira koalia no promete ona maibé Komprimisiu polítiku sira ne’e atrai povu fo fiar ba sira depois tinan 5 mai povu kontente.
“Ita-nia lian no votus la saugati, ita hein governu foun ne’ebé simu tomada dé Pose, konvida uma kreda sarani hotu reza ba ukun na’in sira Maromak haraik ba sira matenek Lalatan nian fuan boot haku’ak povu hotu bele hametin liu tan unidade fraternidade iha rai doben ida ne’e.” Dom Virgílio hakotu.
Jornalista : Delfina Borges
Editór : Orlando Magno
