(Baucau) Mudansa – Eskola Ensinu Basiku Filial (EBF) Uato-Haco Vilenilale Baukau menus fasilidade atu fasilita ba estudante sira, hanesan, kadeira, meza ba estudante sira inklui menus Profesores.
Diretóra EBF Uato – Haco Vilenilale, Marquita A. Freitas informa, fasilidade ba alunus sira nia sala ne’e falta meza, kadeira laiha entaun tenke fahe profesores balu tama dadeer Compostu husi 1o ano, 2o,3o ano no 4o ano to’o 6o ano tama parte lokraik, sira troka malu para bele uza hamutuk.
Nia haktuir, ne’e falta profesores tanba iha ne’e iha eskola parte rua (2) dadeer tama tuku 8:00 to’o tuku 12:30 no parte lokraik tama fali tuku 1:00 to’o tuku 4:30 mak sira sai.
“Iha eskola ne’e falta fasilidades barak tebes hanesan, kadeira no meza ba koordenadóra la iha no ba profesores sira, no mós la iha sala enkontru ba ami,” dehan Directora EBF Uato – Haco Vilenilale Marquita ba Jornalista iha nia knaar fatin Uato-Haco Baukau, kinta 08/06/2023.
Diretóra Marquita haktuir, parte Lokraik nian 3o ano turma ida, 4o ano turma rua, 5o ano turma rua ne’ebe Sira eskola lokraik nian turma 5 no sira eskola dadeer hamutuk turma walu (8).
“Ami prosesu Ensinu aprendizajen ba profesores sira mós livru sira ne’ebé sira kaer ne’e limitadu tebetebes Dala ruma laiha liu mak hanesan livru Reliziaun Moral, Edukasaun Fisika, saúde, livru hirak ne’e mak laiha ba profesores sira atu hanorin no ba estudante sira,” nia afirma.
Nia deklara, Eskola EBF nia kuzina ba merenda eskolár mós aat ona maibé sira halo de’it barraka oan ida hodi te’in iha okos, bainhira udan entaun sente la seguru tanba udan habokon rai hodi te’in ladi’ak.
“Ami iha ne’e bee susar tebetebes atu asesu ba bee moos, tanba durante ne’e kada fulan ami sempre sosa bee iha tanke ho folin $.35.00 ne’ebé ami sente susar ba problema hirak ne’e,” nia relata.
Diretóra ne’e realsa, Buat barak mak menus tebes, husi eskola ne’e maski parte Edukasaun munisípiu ho nasionál haree ona kondisaun eskola maibé la iha resposta husi sira.
“Eskola nia presiza ne’e ami hato’o beibeik maibé governu mós agora ida sai ida tama ne’ebé ita hein to’ok, agora eleisaun hotu ona governu foun atu halo Mudansa oinsá, maibé liu husi Media Mundansa Hau rekomenda ba IX governu agora mai tenke tau atensaun másimu ba eskola (EBF) Ensinu Basiku Filial Uato – Haco Vilenilale tanba buat barak mak menus iha eskola Ida ne’e,” Diretora Marquita sujere.
Tuir dadus estudante iha eskola EBF Uato-HacoVenilale Baukau totál estudante hamutuk 438 kompostu husi TEKA amizade hamutuk na’in 86, no Estudante EBF Uato – Haco nian hamutuk 352.
Jornalista : Zemidonio Martins
Editór : Orlando Magno
