(Dili) Mudansa – Prezidente Partidu CNRT Kay Rala Xanana Gusmão no Prezidente Partidu Demokrátiku (PD) hamutuk ho nia estrutura dadaun aprezenta ona Primeiru Ministru (PM) indijitadu ne’ebé atu lidera governu da sia, ba Prezidente Repúblika (PR) Jose Ramos Horta antes hakat ba serimónia tomada pose iha loron sábadu 01/07/2023.
“Ne’e mak ohin mai, Primeiru Ministru (Indijitadu) maka ho partidu rua, ne’ebé sei hamutuk iha Governu da sia, mai hodi hato’o hanoin atu halo saida, e Prezidente Repúblika mós fó ninia hanoin kona-ba imi labele halo ida-ne’e imi labele halo ida ne’ebá,” dehan Xanana Gusmão hafoin termina sorumutu ho Xefe Estadu iha palásiu prezidensiál, sesta 29/06/2023.
Xanana informa, durante hala’o enkontru Prezidente Repúblika, mós ko’alia kona-ba partidu CNRT ho Partidu Demokrátiku ninia aktu komprimisu sira ba xefe estadu katak partidu rua ne’e iha komprimisu ba servisu iha governasaun ida ne’e.
Nia haktuir, komprimisu partidu nian iha governu da sia maka oinsá atu buka esforsu hotu-hotu la’os de’it atu kurizi buat ne’ebé la’o la di’ak, maibé mós oinsá atu hatutan buat ne’ebé governu hala’o tiha ona iha tinan 10 liubá.
“Ita hatene katak sei iha buat barak mak tenke halo, atu ukun an ne’e bele hetan nia sentidu loloos kona-ba dezenvolvimentu sustentavel no dezenvolvimentu ne’ebé tenke kria kondisaun ba povu bele moris di’ak se lae ukun an laiha sentidu,”dehan nia.
Prezidente Partidu CNRT ne’e afirma, kona-ba se mak sai Primeiru Ministru indijitadu ida-ne’e husu ba média no públiku atu akompaña de’it serimónia tomada de pose ba Xefe Governu indijitadu ho nia estrutura ne’ebé sei hala’o iha loron aban.
Xanana mós haktuir, iha governasaun da sia ne’ebé lidera husi CNRT ho PD, sei haree mós progresu servisu kada membru governu sira nian, bainhira laiha mudansa mak sei akontese aktu remodelasaun tanba ba tur iha ne’ebá la’os atu okupa de’it fatin maibé ne’e atu serví povu.
Jornalista : Julião da Silva
Editór : Orlando Magno
