(Dili) Mudansa – Prezidente Parlamentu Nasionál (PN) Maria Fernanda Lay husu feto maluk timoroan hotu atu prepara an didi’ak hodi enfrenta dezafiu tanba iha prosesu desentralizasaun sei iha serbisu todan ba feto sira.
“Dezafiu ba feto, iha feto sira seluk matenek liu ha’u maibé la iha oportunidade, maski lei fó dalan maibé agora como e que feto prepara an! ou ajuda prepara an konserteza desentralizasaun iha ida-idak nia suku ho aldeia konserteza servisu todan tebes ba feto,” dehan Lay ba jornalista hafoin remata audiénsia dahuluk ho Xefe Estadu Ramos Horta iha Palasiu Prezidensial, Bairro Pite, sexta 29/06/2023.
Tanba tuir nia, iha tradisaun no kultura Timor ninian, mane mak domina feto, tan ne’e depende ba inan no aman, oinsá fó edukasaun ba nia oan feto ho oan mane hanesan nune’e bele eleva koñesimentu.
Nia informa, felismente lei fó dalan atu feto mós asumi kargu maibé kualidade ou kualifikasaun feto nian rasik tenke iha kompeténsia hodi husu tuir ninia papél hanesan Prezidente ka Ministru, Chefi do Suco ka kualkér pozisaun sira seluk ne’ebé feto maluk sira bele konkorre.
Maski iha prosesu desentralizasaun agora ba oin, hanoin servisu todan ba feto maibé mós Feto mak sei apoia, maski individuál, hanesan feto tenke iha vontade, aprende hodi bele konkorre iha fatin sira-ne’e.
Prezidente PN ne’e haktuir, nu’udar kompozisaun ba meza PN, sei tau atensaun másimu ba diretu feto sira atu sai lideransa, tanba dala barak iha Timor-Leste, ema hanoin feto la iha oportunidade sai lideransa.
“Ha’u hanoin iha ezemplu ne’ebé di’ak tebes iha Postu Administrativu Same, Munisípiu Manufahi ne’ebé ita-nia maluk feto ida konkorre ba adjunta do Prezidente Autoridade mais nia kandidatura liu tiha e nunka fó nomeiadu, ida ne’e ami tau atensaun iha futuru tenke fó oportunidade tanba nia hatudu nia mós bele lider hanesan,”katak Fernanda.
Fernanda Lay afirma, iha kompozisaun meza PN foun, nia rasik la mehi atu sai Prezidente maibé ikus mai nia sai prezidente, ne’e hanesan esperiénsia foun ida ne’ebé presiza iha vontade no responsabilidade.
Tanba ne’e, Fernanda Lai ho ninia kompozisaun meza ohin (29/06) mai hala’o vizita dahuluk ba iha palásiu Prezidénsia Repúblika hodi kumprimenta xefe estadu tanba iha momentu ne’ebá xefe estadu audiénsia iha serimónia tomada de pose ba kompozisaun meza.
Jornalista : Julião da Silva
Editór : Orlando Magno
