(DILI) Mudansa – Sekretariu Estadu Formasaun Profissional no Empregu (SEFOPE) servisu hamutuk ho Sekretariadu Estratejia Nasional de Empregu realiza Workshop Nasional hodi Promove kriasaun empregu no redús dezempregu tuir adaptasaun interativa bazeia ba númeru dezempregu ne’ebé aas iha Timor-Leste.
Diretór Geral SEFOPE Paulo Alves informa, workshop ne’e oinsá atu disemina informasaun hodi redús taxa dezempregu ne’ebé maka númeru aas tebes iha Timor-Leste.
Tanba ne’e liu husi workshop refere atu aprezenta mós ba Administrador Munisipiu sira ne’ebé sai mós matadalan oinsá atu redús taxa dezempregu ne’ebé mak aas tebes
“Objetivu husi workshop ne’e konvida hotu Administrador Postu no Prezidente Autoridade Munisipiu inklui Linha Ministeriu relevante sira mai partisipa hodi bele disemina informasaun liga ho estratéjia atu redús taxa dezempregu ne’ebé ita enfrenta hela iha rai laran,” Dehan Diretor Jeral SEFOPE ba jornalista iha salaun Novu Turismu Lecidere, Tersa 28/03/2023.
Nia haktuir Ekip tékniku halo aprezentasaun ba partisipante sira Prezidente Autoridade munisípiu sira tanba sira ne’e mak Xave importante ba solusaun redusaun taxa dezempregu iha Timor-Leste.
“Ita hare taxa dezempregu ne’e poténsia boot tebes oinsá ita atu dezenvolve poténsia ne’e, entaun Presija kria enkontru ida hanesan ne’e atu sira fila ba munisípiu bele identifika joven sira iha munisípiu,” nia deklara
Nia afirma taxa dezempregu iha Timor-Leste ne’ebé boot tebes maka hanesan la iha indústria boot ho nune’e tenke rekoñese kada fulan no semana joven sira kuaze 55,000 mak aplika ba servisu iha rai li’ur ida ne’e hatudu katak númeru dezempregu iha Timor-Leste sei aas.
“Faktus iha Timor-Leste ita seidauk iha indústria boot tenke rekoñese ida ne’e, ita hotu hatene katak iha semana ida ne’e nia laran ema kuaze 55,000 aplika ona prosesu atu ba servisu iha rai li’ur sira ne’e maioria remata Estudu iha Ensinu Sekundariu no aumenta tan Universidade inklui husi sentru formasaun sira,” Nia Akresenta
Entretantu partisipa iha serimónia ne’e mai husi Prezidente Autoridade Munisipiu sira, Admistrador Postu, Diretor Jeral SEFOPE no Membru sira inklui entidade Governu nian.
Estajiada : Remigia Locateli
Editór : Orlando Magno
