(Dili) Mudansa – Timor-Leste Press Union (TLPU), realiza formasaun ba Jornalista sira oinsá promove transparénsia no inkluzaun hodi halo kobertura ba Elesaun Parlamentar (ElPar)Tinan ne’e, atu eleva no hakbiit Jornalista Sira Nia kapasidade.
Prezidente Timor Leste Press Union (TLPU) Candido Alves informa, Formasaun Ida ne’e hanesan matadalan Ida atu ba kobertura iha kampaña no eleisaun, Tamba ne’e antes Tama kampaña Organizasaun TLPU buka dalan oinsá bele servisu hamutuk ho parte kompetente no atu bele haklaken formasaun ne’e ba jornalista sira.
“Jornalista sira labele baruk atu lee, labele baruk atu rona, no labele baruk atu simu ema nia hanoin, hodi hatene buat ne’ebé di’ak no buat ne’ebé aat, nune’e ita bele halo publikasaun ne’ebé furak ba ema hotu lee no rona na’in sira bele simu buat ne’ebé ita halo,” dehan Prezidente TLPU Candido Alves ba Jornalista iha Tower Fahada Dili, tersa 28/03/2023.
Nia haktuir, loron ohin importante, ba jornalista sira ne’ebé partisipa iha formasaun ida ne’e antes tama ba eleisaun parlamentár ou kampaña, sai nu’udar pilár importante haburas demokrasia.
“Hau husu ba ita hotu, no ba belun sira ne’ebé partisipa iha formasaun ida ne’e atu bele partisipa ho di’ak, formasaun gratuita no mós ita hakarak ba oin hetan solusaun,” Candido Afirma.
Jornalista sira hanesan Kasador ne’ebé di’ak tenke prepara antes atu ba kasa, tanba ne’e mak formasaun ida ohin ne’e, hanesan estratéjia ida, antes ba kampaña no eleisaun.
Jornalista tenke hametin unidade liuliu iha festa demokrasia, kampaña no eleisaun, tenke hatuur lolos dasi matak demokrasia hodi haburas iha nasaun demokrátiku importante Ida ne’e.
“Kampaña iha kódigu ida ne’e ema hotu sei tau matan ba jornalista sira nia obra no polítiku sira sei hare iha parte polítika, maibé durante ne’e sei hare tuir ideia tuir ida-idak nia opiniaun,” nia dehan.
Jornalista Sira tenke hatene Oinsa atu bele tetu ka sukat obra ne’ebé atu oferese ba leitóres no hare na’in Sira,
“Maibe atu habadak ha’u-nia diskursu ida ohin ha’u sei hato’o nafatin ba belun sira atu bele rona no hare nafatin, buat ne’ebé mak ita-nia matenek na’in sira sei fó ba ita boot sira iha loron tolu nia laran hahú husi ohin to remata,” nia hakotu.
Estajiadu : Zemidonio Martins
Editór : Orlando Magno