(Dili) Mudansa – Venigia da Conceição de Fatima Borges Feto Foinsa’e ida ne’ebé luta ba moris hahú husi Numeru mamuk (Zero) too susesu no hakarak ajuda fali joven Dezempregu (La iha servisu).
Vanigia Orijen husi munisípiu Ermera mai husi família ne’ebé simples, no nia mak oan ba ikus husi nia maun alin na’in neen iha família uma laran.
Maski iha inísiu hahú husi zero maibé agora Venigia iha mehi ida hakarak ajuda nia maluk joven feto balun ne’ebé seidauk iha kampu traballu ida ne’e la’ós ko’alia de’it maibé realidade nia ajuda ona nia feto maluk balu ne’ebé ba servisu hamutuk ho nia.
“Hau mós hakarak atu ajuda maluk joven balun ne’ebé mak la iha Kampu servisu maski sira mai servisu ho ha’u la’ós permanente maibé halo kontratadu bainhira iha servisu balun ha’u kontaktu sira mai ajuda ha’u selu sira tuir loron ne’ebé mak sira mai servisu,” Dehan nia ba Media Mudansa iha Fatumeta Dili, (27/03/2023).
Feto Bonita ne’e, nia atividade loroloron mak halo Negosiu hanesan Bolus ka cake ne’ebé forma ho modelu oin-oin ba atividade saida de’it.
“Hau hahú hala’o Negosiu iha tinan 2014 no iha momentu ne’ebá ha’u la iha osan atu halo atividade hirak ne’e maibé ha’u-nia maen no mós família balun ne’ebé mak sempre motiva ha’u iha ha’u-nia atividades ne’e rasik,” nia konta.
Nia haktuir iha momentu ne’ebá atu hala’o nia atividade maibé materiál ka buat hotu ne’ebé mak presiza ka uza hanesan Formas, mixer, buat sira ne’e hotu nia mama nian hodi nia hahú aprende halo Dosi hodi han.
“Se ita halo ba han de’it nu’usá la ba fa’an para bele hetan fila fali osan entaun iha momentu ne’ebá ha’u hahú fa’an maibé fa’an ba família sira de’it no hahú husi ida ne’e ho Grasa Maromak nian ha’u-nia Negosiu bele la’o to’o agora,”Nia informa
Enkuantu Bolus ou Cake ne’ebé nia halo kona-ba presu depois mak halo kontratu tuir família nia tanba mesak Timor oan entaun oinsá atu hakmaan malu iha kualkér situasaun.
Aleinde ne’e, Veniga hato’o nia mensajen ba joven sira ne’ebé mak daudaun ne’e seidauk iha kampu servisu atu labele moe halo buat ruma ne’ebé fó benefísiu ba moris loron ida nian.
Estajiadu : Julio da Costa /Isabel de Fatima
Editór : Orlando Magno
