(Dili) Mudansa – Timor oan barak hakarak hadi’a moris, ema ida-idak iha maneira rasik balu servisu iha rai li’ur, balu servisu iha rai laran uza gravatadu no mós ema balu servisu halo negósiu hirak ne’e hotu objetivu ida de’it katak atu hadi’a moris la’ós hateke de’it ba ema seluk nia susesu maibé presiza esforsu an rasik.
Negosiante sigarru Fransisco Costa Lopes informa, nu’udar foin-sa’e hakarak muda rasik moris liu husi dalan negósiu sigarru no pulsa iha dalan ninin tanba lakohi atu tane liman ba inan-aman no mós ba ema seluk maibé hakarak esforsu an buka rasik osan hodi sustenta nesesidade hodi moris ba loron aban nian.
Nia haktuir, Moromak kria ona buat hotu iha mundu ida ne’e entaun kriatura maromak nia hein hala’o tuir hodi atinji objetivu tan buat hotu sei la mai mesak bainhira la esforsu an.
“Hau fa’an sigarru sira ne’e, hakarak esforsu an muda ha’u-nia moris no sustenta rasik ba ha’u-nia nesesidade ne’ebé ha’u presiza maibé lakohi atu tane liman ba no dependénsia de’it ba ema, maski ha’u-nia negósiu ne’e la boot importante maka ha’u la bele penonton de’it ba ema seluk nia susesu,” dehan Negosiante Fransisco ba média mudansa iha área palásiu governu Dili, segunda, 27/03/2023.
Maski negósiu ne’e ki’ik ne’ebé la vale iha ema hotu nia hare maibé nia vantajen ne’e boot tebes tanba ida ne’e ema ida-idak nia esforsu sempre hatudu rezultadu di’ak bainhira la rende ba dezafiu ne’ebé mosu.
“Hau hala’o negósiu ida ne’e hahú ho osan $.80.00 hodi sosa fali sigarru ho pulsa, sigarru L.A. slop ida $.22.50.00 no ha’u fa’an fali masu ida $.3.00 no surya slop ida $.21,50.00 no marlboro $.21.50 ha’u fa’an fali masu ida $.3.00, inklui sosa dolar $.100.00 no ha’u fa’an fali ida $.1.00,” nia konta.
Durante hala’o negósiu iha Dili kuaze besik ona tinan tolu, Husi negósiu ne’e kada loron Francisco hetan osan $.20.00 no $.15.00 no sorte ne’ebé aat liu mak nia hetan $.5.00.
“Benefisiu ba iha ha’u mak hanesan sustenta ha’u-nia nesesidade loroloron no suporta família sira ne’ebé iha foho, osan balu ha’u uza sosa motór fixsion ida, no motór ne’e agora iha hela alin mak uza iha foho ne’ebá,” nia deklara.
Nia rekomenda, nu’udar joven iha Timor tenke iha ona hanoin krítiku no inspira fali ema seluk nune’e labele dependénsia de’it ba ema seluk no labele hein de’it kampu servisu husi governu maibé tenke iha hanoin ida oinsá atu kria rasik kampu servisu hodi haforsa nesesidade uma laran nian.
Frasisco da Costa Lopes orijen husi Aldeia Hauboro suku Kaibada, postu administrativu Baucau, munisípiu Baucau, eskola iha UNDIL Fakuldade Ekonomia Departamentu Akontabidade maibé Agora livre teoria.
Estaziado : Zemidonio Martins
Editór : Orlando Magno
