(Dili) Mudansa – Komisaun A ne’ebé trata asuntu Justisa no Konstituisionál iha Parlamentu Nasionál (PN) ohin (02/02/2023) deside sei aprezenta relatóriu pareser ba meza Parlamentu Nasionál (PN) kona-ba Proposta alterasaun Lei númeru 6/2006 loron 28 fulan dezembru ba Eleisaun Parlamentár (ElPar) ne’ebé aprezenta husi governu.
“Ohin ami halo aprovasaun ba relatóriu pareser eleisaun parlamentár, orsida lokraik haruka ba Prezidente PN atu ajenda ba segunda,”dehan sorry tanba la tau naran fontes,”Dehan Prezidente Komisaun A, Joaquim dos Santos “Boraluli” ba jornalista iha PN, kinta 02/02/2023.
Nia mós haktuir, iha relatóriu pareser ida-ne’e, sita alterasaun lubuk ida, liuliu substánsia ida haree kona-ba situasaun sidadaun iha estranjeiru oinsá mak bele tuir eleisaun parlamentár ho di’ak.
Nia hatete, iha proposta ne’e rekomenda mós kondisaun sira ba defisiénsia matan, tilun, inklui defisiente sira seluk iha periode eleisaun, tanba governu rasik mos dehan iha posibilidade atu kria kondisaun.
“Buat sira ne’ebé ko’alia iha audiénsia ne’e ita sei relata hotu ba, ne’e para iha espesialidade deputadu sira bele konsidera, depois iha problema seluk kona-ba fiskais, tanba aumenta sentru de votasaun no estasaun de votu, partidu sira ne’e mós tenke iha fiskais,”afirma nia.
Fatin hanesan, Vise Xefe Bankada Congresso Nacional de Reconstrução Timorense (CNRT) Patrocínio Fernandes, husu Governu atu aumenta no estabelese sentru votasaun ho estasaun votu iha eleisaun parlamentár 2023 atu hasa’e taxa partisipasaun.
“Ita mós hatene ita-nia jeografia dala ruma hosi suku ida de’it, ita atu kobre de’it suku ne’e hosi aldeia ida ba aldeia ida seluk, lori distánsia dook tebes no mós kondisaun Estrada ne’ebé aat, entaun, hanoin mekanizmu sira atu aumenta tan sentru no estasaun votu ne’e opsaun ida pertinente” dehan nia.
Maibé, vise bankada CNRT ne’e seidauk bele ko’alia detallu substánsia proposta alterasaun lei Eleitorál ba Parlamentu Nasionál ne’ebé Governu aprezenta mai iha PN, tanba sei iha faze audiénsia públika hosi komisaun A trata asuntu Justisa no Konstituisionál, ne’ebé seidauk diskute iha faze jeneralidade.
“Alterasaun lei ne’e presiza reforsa iha ne’ebé, orsida tama iha espesialidade mak ami sei fó komentáriu”,nia hateten.
Tanba nia dehan, Iha lei Eleitorál Parlamentu nasionál ne’e regula hotu ona ko’alia kona-ba direitu ba ema ho defisiénsia sira mós integradu, maibé só presiza tan mekanizmu sira seluk hodi bele reforsa liután.
Nia fó ezemplu, dadaun ema barak ko’alia kona-ba boletín votu braille ba ema ho defisiénsia matan sira, Maibé ema ho defisiénsia hotu iha Timor laran ne’e, sira
asesu ba buat ne’e maibé oinsá akomoda direitu ema hotu nian hodi sira bele asesu no ezerse sira-nia direitu polítiku entermu mekanizmu oinsá mak fasilita, ne’e parte bankada sei fó hanoin iha debate tuir mai.
Jornalista : Ekipa Media Mudansa
Editór. : Orlando Magno
