(Dili) Mudansa – Sua Êminencia Dom Virgílio Kardeal do Carmo da Silva SDB informa, liu husi uma kreda Prontu ajuda pás no estabilidade ba Eleisaun Parlamenta ne’ebé besik ona.
Kardeál Dom Virgílio hato’o asuntu ne’e bainhira halo enkontru ho Komisaun Nasionàl Eleitoral (CNE), ho objetivu prinsipál husi enkontru ne’e oinsá bele ajuda pás no estabilidade hodi ba hasoru Eleisaun Parlamentar.
Primeiru Kardeal iha Timor-Leste Dom Virgilio Kardeal do Carmo da Silva haktuir, ba dahuluk Agradese ba prezidente Komissaun Nasional Eleitoral ho nia komitiva tanba semana rua liu ba haruka karta mai husu atu hasoru malu ohin realiza enkontru ida ne’e prepara ba iha eleisaun parlamentár ne’ebé atu mai daudaun.
“Objetivu prinsipál husi enkontru ne’e uma kreda hamutuk ho Komissaun Nasional Eleitoral (CNE), oinsá bele ajuda pás no estabilidade hodi ba hasoru Eleisaun Parlamentar ne’ebé atu mai daudaun.” Dehan Sua Êminencia Cardel Dom Virgílio do Carmo da Silva SDB ba jornalista sira iha Sala enkontru Camara Metropolitano Diocese Dili, kinta, (02/02/2023).
Sua Êminencia hateten, oinsá bele hamutuk fó liman ba malu kria ambiente ne’ebé di’ak hodi hasoru Eleisaun Parlamentar ne’ebé mak mai, Primeiru programa husi CNE halo semináriu boot hodi envolve relijiaun oioin oinsá bele kria pás iha eleisaun.
“Husi uma kreda hatudu ami nia disponibilidade atu partisipa no kontribui maibé agora sei iha programa jerál seidauk to’o iha programa detallu, semináriu ida Igreja prontu partisipa no kontribui ba programa ne’e, liu husi halo orasaun ida tau propriu ba eleisaun parlamentár.” Sua Éminensia Dom Virgílio Kardeal relata.
Tanba ne’e, Orasun ne’e fulan ida antes kampaña ka Eleisaun sei fahe ba Parokia hotu-hotu Domingo bele reza no família sira kalan bele reza, segundu hanoin mós loron silénsiu nian husi Diocese to’o Parokia realiza misa oras ida no objetivu hanesan hakat ba eleisaun nian.
“Parte husi uma kreda nian sempre iha komisaun justisa no pás integridade hodi halo edukasaun sívika halo mós monitorizasaun Eleisaun nian, parte uma kreda prontu kontinua kontribui ba iha Servisu ida ne’e.” Dom Virgílio salienta.
Iha fatin hanesan, Prezidente Komissaun Nasional Eleisoes (CNE), José Agostinho da Costa Belo argumenta, Objetivu husi enkontru ohin ne’e importante tebes hanesan ohin Êminencia hato’o ona kona ba eleisaun ida ho pás no tranguillu ba ema hotu.
“Timor oan hotu presiza servisu hamutuk, tanba ida ne’e determinasaun ba Timor oan hotu ne’e mak objetivu prinsipál husi enkontru ida ne’e,” Prezidente (CNE), José Agostinho hatutan.
Nia deklara, preparasaun ba eleisaun Parlamentar parte CNE hein de’it prezidente Repúblika fó sai dekreta data Eleisaun. Órgaun Eleitoral sempre preparadu kualkér situasaun hodi prepara eleisaun ne’ebé di’ak ba rai doben Timor-Leste.
Jornalista : Delfina Borges
Editór : Orlando Magno
