(Dili) Mudansa – Deskonfia Autoridade hosi Planu Dezenvolvimentu Nasionál Suku (PNDS) munisípiu Lautém halo intervensaun hodi hapara Konstrusaun Uma Kbi’it La’ek (UKL), husi benefisiáriu António da Cruz iha suku Serelau, postu administrativu Lautém, munisípiu Lautém.
Iha ingormasaun balun Media Mudansa asesu katak, razaun hapara kontrusaun UKL ne’e tanba benefisiáriu ne’e dada bandeira CNRT iha uma leten no kanta Hino Nasionál Patria.
Situasaun ne’e halo Bankada Opozisaun Congresso Nacional de Reconstrução de Timor (CNRT) iha Parlamentu Nasional (PN) sente lamenta tanba tuir loloos governu labele hamosu diskriminasaun ba direitu benefisiáriu.
Deputadu CNRT Patrocinio Fernandes konsidera membru governu laiha moe, tanba governu liuhusi autoridade hapara programa UKL ida iha Suku Serelau, tan de’it nia hili opsaun hodi dada bandeira CNRT iha uma leten.
Patrocino afirma, xefe suku ida halo deklarasaun liu husi Video katak, governu atu foti filafali uma kbiit -laek ida husi Benefisiariu, tanba de’it, benefisiáriu ba uma kbiit -laek ne’e, militante CNRT nian, tanba nia hola ninia opsaun polítika ida ba partidu CNRT.
“Membru governu moe laiha, tanba komesa atu hanoin katak, sasán sira povu nian ne’e, atu halo sai fali sasán partidu nian,”dehan Deputadu Patrocinio ba jornalista iha PN, kinta 02/02/2023.
Membru PN ne’e haktuir, bainhira partidu polítiku ida mak hetan konfiansa atu ba kaer ukun, ninia servisu mak atu halo de’it jestaun ba rekursu estadu ninian, maibé la’os atu ba hatete dehan ida ne’e ninia, no ida ne’ebá ninia.
“Hau sente Lamentavel tebetebes, kuandu membru governu sira utiliza programa governu ou programa estadu ninian, ho rikusoin estadu ninian hodi halo atividade ou halo kampaña polítika atu atrai ema hodi hili sira-nia partidu,” afirma nia.
Iha Fatin hanesan, Deputadu Bankada Frente Revolusionáriu Timor-Leste no Independente (FRETILIN) Joaquim dos Santos ‘Boraluli’ defende sidadaun hotu iha diretu atu asesu ba programa UKL husi governu, tanba implementasaun ba programa ida ne’e ho universalmente.
“Ha’u sente, programa polítiku ou UKL ne’ebé governu implementa ne’e tuir kompromisu eleitorál, bazeia ba imperativu konstituisaun kona-ba universialidade de diretu, tuir prinsípiu igualidade de direitu, ema hotu-hotu iha diretu hanesan, tuir prinsípiu, kuandu halo ezekusaun ruma (pilih kasih) ne’e labele, tanba ita viola prinsípiu de konstitusionál,” Joaquim relata.
Nia mós afirma, bainhira governu ezekuta programa UKL labele halo preferénsia ou implementa programa ida ne’e ba sidadaun ka grupu A, B ou C, ne’e labele.
“Ita implementa programa labele identifika uluk ema ne’e nia kór, tanba governu kria regras ou kritéria atu fó ba komunidade sira hamutuk ho ekipa ne’ebé governu kria, hodi klasifika sé mak bele hetan no sé mak labele hetan,”nia hatete.
Ne’e duni, tuir nia, kuandu iha prosesu ne’e mak sidadaun, kumpre ona kritéria, entaun sira iha diretu atu hetan. Mezmu sira hanesan militante FRETILIN, CNRT, ou KHUNTO, maibé ne’e la’os problema atu impede ezekusaun ba programa ne’e.
“Ema ruma halo impedimentu ba prosesu ne’e tenke aprezenta razoens ne’ebé bele justifika impedimentu, entaun governu mós labele naran foti desizaun, tanba polítika dezenvolvimentu ne’e ba ema hotu-hotu,”afirma nia.
Jornalista : Ekipa Media Mudansa
Editor : Orlando Magno
