(DILI) Mudansa – Prezidente Komisaun Nasional ba Eleisoens (CNE-sigla Portuges) José Belo informa, fornese informasaun ne’ebé kredivel no transparénsia iha eleisaun parlamentár ba partidu polítiku no eleitór sira atu komprende didi’ak rezultadu eleisaun presiza servisu hamutuk ho média sira.
“Hakarak eleisaun ne’ebé di’ak, demokrátiku no transparénsia entaun média nia papél importante la’os de’it média ne’ebé públiku maibé nivel instituisaun mós tenke iha komprensaun di’ak atu, bele servisu hamutuk ho média sira hodi pasa informasaun to’o iha ita-nia populasaun sira,” dehan Prezidenti CNE José Belo, ba jornalista hafoin remata formasaun, iha salaun CNE, kinta feira 23/02/2023.
Jose Afirma, atividade ohin ne’e CNE servisu hamutuk IFES ne’ebé suporta husi USAID, programa ne’e fokus liu ba komunikasaun ne’ebé efetivu iha tempu eleisaun hodi fó sai informasaun ne’ebé efetivu ho kualidade no efisiénsia atu nune’e eleitór, partidu polítiku no partisipante sira.
“Formador sira ne’e mesak iha kualidade, Alan Wall ema ne’ebé espesialista iha área ida ne’e, sira sei fahe matéria ba funsionáriu CNE ne’ebé mai husi munisípiu, oinsá atu sira bele fahe informasaun ne’ebé kredivel, informasaun ne’ebé fó sai ne’e fontes husi ne’ebé, i depois informasaun ne’ebé sai ne’e labele halo ema konfuzaun,” nia haktuir
Prezidente CNE relata, objetivu husi formasaun ne’e maka oinsá kapasita koñesimentu funsionáriu CNE nian atu asegura eleisaun ne’e la’o ho di’ak bainhira atu fó sai informasaun tenke kredivel no informasaun ne’ebé fó sai ne’e labele hamosu polémika.
Iha fatin hanesan Enkaregado USAID Rebecca Robinson salienta, CNE) nia servisu, maka liña frente husi esforsu makas Timor Leste nian atu harii demokrasia, hanesan nasaun demokrátiku iha Estado Unidos Amerika, prontu apoiu esforsu sira ne’e.
“Ami nia apoiu reflete Prezidenti Joe Biden nian komitmentu kle’an katak, atu responde dezafiu ne’ebé mundu ohin loron hasoru demokrasia signifika halibur ema hotu aprende hamutuk hamriik hamutuk no foti asaun hamutuk,” katak Rebecca.
Nia informa, Pontu esensiál husi atividade ne’e maka atu hametin partisipasaun inkluzivu, informadu no efetivu husi ema hotu nia partisipasaun iha Eleisaun Parlamentar 2023.
“Estados Unidos oferese fundu adisionál 1.25 millaun dolar, liu husi USAID apoiu ba eleisaun parlamentár ne’ebé inkluzivu, livre, justu no kredivel,” tenik nia.
Jornalista : Esperança Monteiro Soares
Editór : Orlando Magno