(Dili) Mundansa – Ministru Ensinu Superior Siensia no Kultura (MSSK) Longuinhos Dos Santos hato’o parabéns ba Institutu Ciensia Saude ne’ebé gradua finalista hamutuk 256 husi Fakuldade Siensia Saúde kompostu husi departamentu 5.
“Hau nia parabéns ba estudante finalista sira ne’ebé ohin simu graduasaun no mós ba família ne’ebé marka prezensa iha serimónia ida-ne’e, ha’u felisita ICS, liuliu Magnífiku Reitór ho nia estrutura sira bele finaliza ninia rekursu akadémiku,” Ministru MSSK Longuinhos liu husi nia diskursu iha serimónia graduasaun ICS iha CCD kinta, 23/02/2023.
Governante ne’e akresenta, graduasaun nu’udar momentu importante ba instituisaun ensinu superiór ida signifika instituisaun ida-ne’e hatene ona tau kondisaun atu iha tinan 4 nia laran, estudante sira ohin bele gradua, aprende didi’ak no fó resposta ne’ebé pozitivu tebes ba ezijénsia akadémika sira.
“Hau partisipa iha serimónia graduasaun ida, sente konvensidu tanba juventude maka rikeza boot Timor-Leste nian tanba Notísia di’ak ne’e mai hosi estudu demográfiku ne’ebé koñesidu tebes, hatudu katak maioria hosi ita-nia populasaun foin-sa’e sira, tan ne’e, tenke optimista nafatin ba futuru Timor,” nia relata.
Longuinhos afirma, Joven sira hanesan rikeza potensiál signifika sira reprezenta de’it oportunidade ida, no la’os garantia ba rikeza tanba futuru prosperu, tenke iha konsiénsia atu transforma foin-sa’e sira-nia potensialidade hodi haforsa liután dezenvolvimentu Timor-Leste.
“Ita presiza nafatin investe iha kualidade, relevánsia no empregabilidade ba kursu sira ne’ebé atu fó ba ita-nia joven sira, hosi Instituisaun Ensinu Superiór públiku no privadu sira.” nia subliña
Iha fatin hanesan Magnifiku Reitor ICS Domingos Soares argumenta, ba Graduadus na’in 256 ne’ebé simu graduasaun servisu tuir Ciensia ne’ebé sira simu ba iha kualidade tanba profissionalidade ne’e vokasaun ida.
“Vokasaun hanaran profisaun, sira nia espesialidade, ha’u husu ba Graduadus na’in 256 ne’ebé simu graduasaun servisu tuir Ciensia ne’ebé imi simu ona, labele halo hanesan maluk sira ne’ebé servisu tiha ona la halo tuir sira nia devér no obrigasaun,” Reitor ICS Domingos salienta.
Iha sorin seluk Estudante ICS Fakuldade Ciensia Saude Departamentu Parteira Rozalina Amelia Alves deklara, nu’udar estudante agradese tebes ba parte ICS maibé nia parte sei aplika buat ne’ebé maka aprende ona.
” liu husi graduasaun ne’e ha’u hato’o Agradese ba ba buat ne’ebé ami aprende ho esperansa no kbiit ne’ebé ami iha nafatin esforsu an tane no aplika ba iha sosiedade sira liuliu ba rai doben Timor-Leste ne’ebé presiza ami nia tulun.” Nia apresia.
Graduadus hirak ne’ebé ohin gradua kompostu husi Departamentus enfermajen na’in 13, Departamemtus Parteira na’in 145, Departamentu Farmacia na’in 59, Departamentu Nutrisaun na’in 16, no Departamentu Laboratoriu Ciensia Barco 23.
Jornalista : Delfina Borges
Editór : Orlando Magno
