(Dili) Mudansa – Ohin Kinta Feira 23/02/2023, kalan pur volta tuku 7 ho balun, akontesimentu ahi han uma mean karantina iha tasi tolu, vítima insendiu la konsege salva sasán no dokumentus sira iha uma laran maibé vítima Orlandu de Deus konsege salva de’it estátua na’in feto Maria husi akontesimentu ne’e.
Hafoin akontese insediu ne’e akontese liu minutu balu ekipa Bombeirus to’o kedas iha fatin hodi rega mate ahi, maibé la konsege salva komunidade nia sasán no dokumentu importante iha uma laran .
Vítima Insendiu Orlandu de Deus informa, derrepente ahi han uma mean husi ninin maibé volume ahi aumenta boot ba beibeik halo sira la konsege salva dokumentu no mós sasán uma laran no mós osan inklui hahán sira iha uma laran.
Maski la salva sasán no dokumentu iha uma laran maibé Vitima insentivu Orlando konsege salva estátua na’in feto Maria husi ahi ne’ebé lakan ho volume boot.
“Hau halai sai husi uma laran la konsege lori sasán ida maibé ha’u konsege foti no haku’ak de’it estátua inan Maria hodi halai sai husi uma laran, lolos ha’u atu salva sasán balun iha uma laran maibé ahi suar metin liu entaun ha’u la konsege foti sasán sira iha uma laran inklui osan no dokumentu,” dehan vítima Orlando ba média mudansa iha fatin akontesimentu Tasi tolu Dili, kinta 23/02/2023.
Nia haktuir, husi akontesimentu ne’e família sira konsege salva an sai hotu husi uma laran no mós hanesan ho maluk sira seluk nian, maibé maluk balun ne’ebé hela iha ninin liu balu salva sira nia sasán uitoan no balun la salva
Vítima Insendiu ne’e afirma, nia parte sente admira tebes ho akontesimentu ne’e, tanba derrepente de’it ahi han ona uma, halo sira la biban atu salva sasán iha uma laran, maibé Orlando nafatin agradese tanba sira uma laran kompletu hotu la iha ida mak kanek no lakon vida,
“Kona-bá sasán ne’ebé ahi han mutuk ne’e ita ema sei moris maromak sei fó dalan hodi ita hetan fila fali iha loron tuir mai,” nia deklara.
Tuir dadus Provizoriu ne’ebé média mudansa asesu, Uma kain ne’ebé hela iha uma mean karantina hamutuk uma kain 40, ema hamutuk 300 resin nune’e mós Komunidade sira ne’ebé Hela Iha karantina maioria mai husi Munisípiu Ermera, Bobonaru Lautem no mós husi munisípiu Manufahi.
Tuir observasaun jornalista média Mudansa nia iha terenu katak, insentivu ne’e mosu deskonfia kauza husi lina eletrisidade.
Jornalista : Hristo Alves dos Santos
Editór : Orlando Magno
