(Dili) Mudansa – Sekretariu Estadu Komunikasaun Sosial Mericio Juvinal dos Reis “AKARA”hateten,SEKOMS kontinua programa ne’e ba eskola hotu-hotu tanba 70% joven estudante maka uza média Digital ho kampaña sira hanesan ne’e kapasita fó hanoin reforsa joven sira iha hanoin krítiku.
Programa Kampaña Nasional kombate Hoax promove Internet saudavel liu husi sensibilizasaun literasia Digital ba eskola Sekundadaria no Universidade iha Dili laran inklui munisípiu.
“Governu konsidera Era Digital ida ne’e importante ba Nasaun hotu -hotu inklui Timor leste tanba 70% joven sira uza média Digital sei lori sensibilizasaun foun mai ita-nia rai iha mudansa pensamentu hahalok (life style) no Era Digital agora sei fó oportunidade oioin mai ita oportunidade pozitivu no negativu,” Dehan SEKOMS Mericio Juvinal Dos Reis “AKARA” ba Jornalista iha salaun Saun José Operario Balide Dili,Tersa, (21/02/2023).
Governante ne’e esplika, agora telemovel oioin, joven sira iha hanoin krítiku kapasidade matenek uza média sosiál ba sensibilizasaun ida ne’ebé pozitivu ba matenek hodi lori poténsia pozitivu nasaun nian ba rai li’ur no simu matenek iha rai li’ur hodi dezenvolve rai Timor no kombate lia falsu “HOAX”.
“Iha komunidade nia leet ema lansa dezinformasaun,misinformasaun no malinformasaun bele destroi ita-nia unidade hormona sosiál iha ita-nia leet,tanba ne’e Estadu iha responsabilidade prepara liu husi kampaña sira ne’e atu sidadaun sira uza média sosiál ne’e ho di’ak no matenek.” Nia subliña.
Nia afirma, Tinan 3 ka 4 mai iha mudansa ona ba teknolojia hanorin joven sai matenek liu, uza Litersia Digital ne’e fó hanorin ba joven sira atu hanoin krítiku no Fiar joven sira aumenta koñesimentu no matenek.
Iha fatin hanesan Vice-Prezidente Parlamentu Nasional (VPPN) Maria Angelica hateten, Joven milineal ne’e maka joven ne’ebé uza teknolojia no nia labele husik teknolojia iha nia moris.
“Tempu agora teknolojia Era Digital buat hotu ita asesu liu husi média, nia di’ak mós iha komunidade nia leet, Iha peskiza hatudu katak 34% populasaun mundiál husi 34% ne’e iha joven 50% maka tama iha merkadu de traballu sira uza teknolojia atu dezenvolve sira nia kapasidade, abilidade koñesimentu krítiku atu kompete iha merkadu de traballu iha tempu teknolojia no Era dijitál,” Angelica akresenta.
Prezidente Interino Konsello Imprensa Francisco Belo Simões afirma, Mundu Digitalizasaun ida ohin loron ne’e Lori buat di’ak no lori mós buat aat maibé depende ba ema ida-idak nia utilizasaun.
“Agora ita hotu-hotu uza telemovel tenke atensaun barak liuliu disinformasaun ” HOAX” alin sira idade seidauk to’o atu ba vota maibé Hoax ne’e la’o makas iha ámbitu polítiku, ema balu uza Facebook hatuun no insulta figura balu, ita halo literasia informasaun ne’e tebes ka lae?”Nia hateten.
Pe.Edgerio Martins SJ argumenta, hasa’e pensamentu krítiku iha parte Igreja nian, husi mundu teknolojia tama ba Era Digital tenke iha kapasidade komprende ba situasaun.
“Uza plataforma Digital ne’ebé di’ak ho saudavel ita la gasta tempu ba kombate buat ida Hoax, maibé ita gasta tempu ba hasa’e ita-nia koñesimentu krítiku atu ema labele bosok ita, tanba ita iha kakutak no prinsípiu rasik oinsá atu hasa’e pensamentu krítiku ba konsiénsia ne’ebé kritika.” Pe. Edgerio hatete.
Entretantu Vice-Diretor eskola São Jose Operario João Pinto mós hato’o, agradese ba SEKOMS ho nia ekipa realiza programa sensibilizasaun Litersia Digital kombate Hoax hodi prevene estudante sira labele monu ka fiar ba informasaun falsu “HOAX”.
Jornalista : Delfina Borges
Editór : Orlando Magno
