- (Lautem) Mudansa – Mane Timor oan ida halibur roda aat hodi bou iha uma tanba iha hanoin kreativu ida atu transforma roda ba sinelus depois fa’an ba ema seluk hodi hetan osan uitoan sustenta nesesidade uma laran.
Esforsu an buka osan sustenta família ne’e la’os buat foun ba xefe família, kada uma kain ida, tanba asumi ona responsabilidade nu’udar aman tenke buka meius oioin hodi hetan osan ba oinsá bele responde nesesidade uma laran.
Loos duni, prosesu atu hetan osan iha loron ida presiza esforsu an maka’as, Bainhira la esforsu an susar tebes atu hetan osan iha loron ida, tanba ne’e tenke halo buat ne’ebé ita hatene maski nia benefísiu ne’e natoon de’it maibé buat hotu presiza esforsu.
Situasaun ne’e akontese ba Sergio Eugenio dos Santos husi Bairo Laiku, Aldeia Nakroman, Suku Fuiloro, Postu Administrativu Lospalos, Munisipiu Lautem nu’udar aman ida ne’ebé sai responsabilidade boot ba oan na’in lima no família, maibé Sergio garantia liu ba ninia abilidade ne’ebé dadaun ne’e nia iha.
Sergio informa, sinelus ne’ebé Sergio fa’an ne’e ninia produtu rasik, tanba nia iha hanoin kreativu kona-ba oinsá bele transforma roda sai fali sinelus ne’ebé ho kualidade bele uza to’o tempu naruk, halo ema barak laran monu hakarak sosa.
“Ha’u-nia hanoin bainhira ita iha kreativu bele implementa oinsá bele fó vantajen, tanba ne’e ha’u garantia ba ha’u-nia atividade ne’e bele sustenta ba ami-nia moris loron loron maski ne’e la fasil maibé buat hotu presiza ita-nia esforsu”, dehan Sergio ba Media Mudansa iha nia knaar fatin Lautem, tersa 21/02/2023.
Xefe Familia ne’e haktuir, Maske atividade ne’e nia sente todan maibé Segio la lakon vontade hodi hala’o nia servisu loroloron tanba ho hanoin ida katak, nu’udar aman tenke iha responsabilidade ba buat hotu iha uma laran.
Nia Afirma, Bainhira prodús roda ba sinelus sei lori tempu naruk tuir nia prosesu bainhira roda sira ne’e prontu ona iha uma maka foin koá roda, Bainhira prontu ona, kontinua ba faze ikus maka monta talin no prega tiha halo kabeer nune’e labele estraga estraga ema nia ain.
“Profesor balun husi Manatutu – Laclubar buka tuir sinelus ne’e to’o iha Lospalos tanba nia hakarak fa’an iha Laclubar, entaun ha’u fa’an ba nia lusin ida ho folin $.50.00 depois profesór ne’e fa’an fali sinelus nee iha Laclubar ne’ebá ida $.7.00, aleinde ne’e malae husi portugál mós mai sosa sinelus Tolu (3) lori ba Portugal,” Nia afirma.
Iha fatin hanesan sasin Erfel dos santos hatete, Eugenio moris hanesan ema ne’ebé kreativu tanba durante ne’e nia esforsu an maka’as liu husi atividade ida ne’e maka sustenta ninia família.
“Sinelus nee, halo komunidade munisípiu Lautem kuaze uza hotu tanba komunidade halo komparasaun ho sinelus importasaun husi rai li’ur nia kualidade la hanesan Sinelus roda ne’ebé ita bele uza dura to’o tinan rua tolu,” Efren argumenta.
Iha sorinn seluk konsumidor Martinho de Jesus da Cunha hatete, sinelus roda ne’e diak liu duke sinelus importasaun tamba sinelus roda ne’e bele uza too tempu naruk laos hanesan sinelus importasaun.
Entretantu, Eugenio halo atividade tranforma roda ba sinelus nee hahu iha tinan 2006, no produtu ne’e rasik, Lospalos oan sira barak mak sosa hodi uza, tanba sira konsidera sinelus ne’e kualidade no dura ba loron naruk.
Jornalista : Aristo dos Santos
Editor : Orlando Magno
