(Baukau) Mudansa – Ekipa Prezidénsia Repúblika, Tersa-Feira ne’e, ajuda família vulneravel ida iha Aldeia Boleha, Suku Soba, Postu Administrativu Laga, Munisípiu Baucau hodi hakmaan família sira nia difikuldade.
Duarte Pereira hetan Asidente Vascular Cerebral – AVC ka Stroke iha tinan 2019, hodi halo nia sai defisiénsia no susar atu halo mobilidade.
Defisiénsia fízika ne’e obriga Duarte hodi husu ba nia kaben atu halo divórsiu, hodi fila ba nia família hamutuk ho nia oan-mane ida no Duarte hela ho oan-mane rua ho feto ikun ho idade 12.
Oan-Mane dahuluk hanesan estudante Ensinu Sekundáriu Tekinomata, daruak deside la eskola hodi tau matan ba família.
“Duarte hela mesak, nia feen divórsiu tanba kondisaun moris. Mezmu kondisaun nune’e, nia (Duarte) sempre hetan mós tulun husi nia oan, família viziñu inklui Suku rasik ne’ebé sempre oferese hahán balun,” Dehan Xefe Suku Soba, Francisca Mónica de Fátima Soares ba Jornalista iha Soba Baukau, 21/02/2023.
Nia haktuir, Durante ne’e, Difisiensia Duarte hetan asisténsia maka’as husi nia oan-feto ho idade 12 ne’e. Tau matan ba nia apá nia hahán (te’in) no nesesidade seluk ne’ebé nia apá presiza,
Xefe Suku Soba, Nísia (oan feto) tenke prepara matabixu, ai-han meudia no mós kuru bé, molok ba eskola no uza de’it lampra hodi estuda iha tempu kalan, tanba Aldeia Boleha seidauk asesu ba eletrisidade.
“Agradese tebes ba apoia ne’ebé mai husi Prezidénsia Repúblika ba ha’u nia komunidade vulneravel ne’e. Agradese liu tan, bele mós halo terapia ba nia,” Hateten Autoridade Lokál ne’e.
Apoiu ne’ebé mai husi ekipa Prezidente Republika kompostu husi foos, mina te’in, kulixaun no nesesidade bázika seluk, oferese direta husi Asessór Prezidente Repúblika ba Servisu Sosiedade Sívil no Assuntu Sosiál Quintiliano Moníz Carvalho.
Hafoin ne’e, ekipa Prezidénsia Repúblika kontinua distribui apoiu ba família vulneravel iha Munisípiu Lautem no Viqueque.
Jornalista : Ekipa MediaMudansa
Editór. : Orlando Magno
