(Dili) Mudansa – Moris ona sempre hasoru dezafiu oioin bainhira esforsu an atu hatutan moris tanba dalan moris atu moris naruk ba ema ida-idak la hanesan tan maromak kria nanis ona atu ema la’o tuir nia moris loroloron.
Ema hotu moris, kriatura husi maromak nia sempre, balu moris iha buat hotu balu moris iha terus no susar laran tanba ema balu buka moris atu hatutan moris liu husi halo negósiu maibé lakohi dependénsia ba ema seluk.
Timor-Leste hetan independénsia to’o ona tinan 20 resin maibé Timor oan balun nafatin moris hakdasak iha nia rain rasik, aat liu tan governu duni sai Timor oan iha sidade Dili ne’ebé hela iha rai estadu hodi hakonu fali ema estranjeiru domina iha kapitál nasaun Timor-Leste, Upssss…. Rai doben Timor Ó di’ak ka Lae?,
Timor oan ida moris iha terus no susar nia laran maski ho idade avansadu ona maibé ho vontade tomak tuur hakdasak hodi hamaluk ninia produtu ne’ebé nia fa’an atu hetan netik osan uitoan hodi uza ba moris naruk.
Dadeer-saan rai huun mutin loro-matan hahú hatudu an hodi leno nia roman ba mundu atu ema moris hala’o atividade buka loroloron, iha oras dadeer-saan gravatadu sira hakat sai husi uma hi’it pasta sa’e karreta prado ba servisu iha kantór tuur iha kadeira roda hodi sente Ace nia malirin kontinua halo atividade.
Ooh… kuitadu inan faluk ida ninia atividade oin seluk fali, dadeer-saan tuku 7:00/8:00 hi’it malus no bua ne’ebé falun metin ho saku soe ba ulun (tutur) hi’it ain hakat sai husi odamatan hodi la’o mai fa’an iha trotoár área rotunda Saudozu Francisco Xavier to’o lokraik tuku 5 : 00 Mak foin Fila ba uma.
Situasaun ne’e realidade akontese ba, negosiante Feliciana Medonça ho idade 72, husi aldeia Sentru Da Unidade, Suku Kaikoli, postu administrativu Vera-Krus municipiu Dili, hatutan moris liu husi fa’an bua no malus hodi sustenta nesesidade uma laran.
Inan faluk Feliciana konta ninia istória ba jornalista Media Mudansa no estajiadu (MD) nia nune’e, idade la sai sasukat ba nia atu buka moris hodi sustenta nesesidade uma laran, maski idade avansadu maibé nafatin esforsu an oinsá bele han iha loron no kalan.
Istória moruk ne’ebé inan faluk ne’e relata, dadersaan atu ba fa’an sasán iha merkadu lama, dala ruma han matabixu maibé ema la sosa ninia produtu entaun hakarak ou lae nia tenke kastigu kabun husi dadeer to’o fila ba uma.
Nia dehan, halo buat ne’ebé tuir ema ida-idak nia bele maski simples maibé nafatin kontente no agradese ba maromak tanba sei bele dada iis hodi moris naruk iha mundu ida ne’e.
“Hau nafatin agradese ba maromak, maski buka moris liu husi atividade simples hanesan ne’e, maibé bele fó moris naruk mai ha’u,” dehan negosiante Feliciana Mendonca ba Jornalista Mudansa iha Areadoris Kaikoli Dili, kinta 23/02/2023.
Feto mestisa ne’e haktuir, produtu ne’ebé nia fa’an, sosa tutan de’it iha merkadu Taibesi mak hanesan bua, malus, ahu, hodi fa’an fali iha Merkadu Lama.
“Ha’u fa’an bua, malus, sira ne’e atu hatutan ha’u nia iis moris no sustenta nesesidade uma laran nian, se ita lakohi halo ida ne’e, entaun ita atu halo saida, maski moris liu husi buat simples ha’u prontu la’o tuir maromak nia planu,” inan faluk Feliciana relata.
Halo negósiu ki’ik la hanoin atu moris sai riku maibé importante maka oinsá atu han hahán bikan ida hodi kalsu kabun iha loron ida hodi kontinua moris.
“Hau fa’an bua, malus, ahu no haas ida ne’e hanesan hodi hatutan ami nia iis loroloron nian,no laos atu halo riku hau nia aan, maibé kabun mak ezije ha’u hodi mai fa’an iha ne’e,” nia afirma
Inan feto Bonita ne’e relata, bua, malus ne’e nia sosa futun tolu $.2.00 no fa’an fali futun ida $.1.00 entaun nia hetan osan funan $.1.00, no mós nia sosa bua kesak tolu ho folin $.1.00 no fa’an fali kesak ida sentavus 50.
“Ha’u ba sosa iha Taibesi mak mai fa’an fali iha ne’e, maibé ha’u nunka lakon ha’u-nia vontade atu kontinua fa’an tanba ha’u-nia moris depende de’it ba atividade ida ne’e,” Feto terseira idade ne’e haktuir.
Avoo Feliciana iha oan mane na’in rua (2) maibé sira forma ona família entaun oan sira tenke servisu maka’as hodi sustenta ba avoo Feliciana nia bei-oan sira.
“Hau agora iha oan mane na’in rua agora sira hotu hare ba sira nia moris, ne’ebé ha’u lakohi atu atu husu beibeik osan ba sira, tanba sira mós agora forma ona família ne’ebé ita mak tenke komprende ho sira nia situasaun,” nia hakotu
Estajiadu : Zemidonio Martins
Editór : Orlando Magno
