(Dili) Mudansa – Asosiasaun Jornalista Timor Lorosa’e (AJTL), La fó Espasu no fleksibilidade ba Informasaun Hoax Atu Buras Iha Mundu Jornalismu no mós iha nasaun Timor-Leste tanba informasaun falsu bele halo ema barak sai vítima.
Prezidente AJTL Zevonia Viera informa, AJTL nia servisu ida mak atu kontra hoax ne’e la bele buras, tan ne’e nafatin alerta ba jornalista sira katak la bele koko atu interpreta Hoax ne’e di’ak, tanba informasaun falsu ka lia bosok ne’e jornalista nia inimigu.
“Hoax ne’e la di’ak ka la iha fleksibilidade atu dehan kualidade ne’e lae, Hoax ne’e lia bosok, entaun ita iha direitu no devér atu kombate hoax ita la iha papél ida atu fó fleksibilidade hoax atu buras iha mundu Jornalizmu,” dehan Prezidente AJTL Zevonia Viera ba jornalista iha Farol Dili, Domingu 12/02/2023.
Zevonia haktuir, AJTL halo ona asina akordu ho UNESCO sei hamutuk ho Konsellu Imprensa, Universidade Nasionla Timor Lorosa’e atu kria Aliansa Nasional ba verifika faktus ne’ebé sai aliansa ofisiál, maibé oinsá grupu ne’e servisu loroloron hodi verifika informasaun falsu, nune’e públiku la bele fiar ka monu ba Hoax.
Nia relata, durante ne’e, AJTL halo Observasaun katak hoax ne’e akontese kada loron ho númeru ne’ebé mak boot tanba ita seidauk iha monitorizasaun ne’ebé atu deteta nia sa’e ka lae maibé númeru hoax ne’e akontese hela de’it
“Hoax ne’e atu la iha ne’e susar maibé atu kombate ka redús ne’e tenke servisu hamutuk nune’e ema la bele fiar ba informasaun falsu,” Zevonia deklara.
Nia afirma, Agora tempu eleisaun hanesan ne’e informasaun falsu propaganda, Disinformsaun, liafuan ódiu ka rasizmu sira ne’ebé fó sai husi partidu polítiku ho sira nia propaganda ne’e eziste ona tanba ne’e jornalista sira tenke akompaña informasaun ne’ebé halo ema monu ba propaganda hodi dada votu.
Nia akresenta, Durante ne’e AJTL fó formasaun literasia dijitál la’ós de’it ba Jornalista maibé fó mós formasaun ba estudante Universidade sira atu servisu hamutuk bele halo advokasia kona ba oinsá mak públiku bele fiar Notisia ne’ebé loos.
“Bainhira ema fiar informasaun falsu, signifika ema la fiar ona Jornalista sira nia servisu tanba Jornalista sira nia servisu mak verifika no buka tuir dadus ne’ebé loos, Atu hasai ou hamenus númeru hoax, ita tenke badinas verifika informasaun ka dadus ne’ebé loos,” nia akumula.
Jornalista : Ekipa MediaMudansa
Editór : Orlando Magno
