(Dili) Mudansa – Asosiasaun Jornalista Timor Lorosa’e (AJTL), realiza formasaun ho tema “Digital and Physical Safety Training” ba membru AJTL oinsá jornalista halo seguransa ba nia an bainhira halo kobertura ho seguru iha fatin risku no mós halo seguransa ba nia an iha era dijitál
AJTL realiza formasaun ne’e tanba halo kolaborasaun ho Aliansa Journalits Independent (AJI), iha Indonesia, asosiasaun jornalista iha Malazia, Tailandia, Kambodia no mós asosiasaun jornalista iha filipina kolabora hamutuk ho prinsípiu ida atu luta ba liberdade imprensa no mós liberdade espresaun iha sudeste aziátiku.
Prezidente AJTL Zevonia Viera informa, AJTL Kapasita nia membru sira iha área oioin liuliu kona-ba oinsá halo seguransa fíziku no mós seguransa dijitál ba ida-idak nia an.
“Formasaun ida ne’e oinsá mak jornalista sira asegura an bainhira halo kobertura iha fatin risku ka fatin ameasadu, demonstrasaun, no fatin konflitu sira atu jornalista sira hatene an ona oinsá bele salva an no mós salva ekipamentu jornalista nian inklui oinsá halo reportajen ho seguru iha fatin risku,” dehan Prezidente AJTL ba jornalista iha Fundasaun HABURAS Farol Dili, Domingu, 12/02/2023.
Nia haktuir, formasaun ida ne’e importante tebes ba jornalista sira iha sudeste aziátiku tanba jornalista barak mak sai ameasadu no lakon vida iha fatin risku ho ida ne’e maka AJTL realiza formasaun ba jornalista sira antes hetan ameasa no halo kobertura iha fatin risku.
Zevonia relata, formasaun ne’e hetan apoiu másimu husi AJI, reinu Olanda, governu kanadá, no mós ajénsia globál média sira ne’e mak apoiu osan atu fasilita formasaun ba membru asosiasaun sira ho orsamentu ne’ebé parseiru sira apoiu ba asosiasaun iha sudeste aziátiku kada asosiasaun hetan osan hamutuk $.10.000.00.
“Osan ida ne’e la’ós de’it ba formasaun maibé ba inklui atividade iha asosiasaun maibé osan ne’e vale de’it ba fulan neen nia laran depois sei halo fali kontratu foun oinsá mak asosiasaun neen ne’e, bele esforsu an no buka nafatin fundus hodi apoiu programa sira,” nia deklara.
Prezidente Zevonia mós hato’o sentimentu obrigadu ba jornalista sira ne’ebé tuir ona formasaun ida ne’e maibé nia parte triste uitoan tanba iha balun tuir formasaun la du’un sériu maibé fila fali ba ida-idak nia an, karik hakarak kapasita an liu husi formasaun hodi hasa’e koñesimentu iha área jornalizmu nia.
“Jornalista ne’ebé tuir formasaun loron rua ne’e, espera katak bele fahe tutan ba kolega sira ne’ebé seidauk hetan formasaun ne’e, bainhira imi salva an iha fatin risku sira ami sente orgullu tanba buat ne’ebé ami fahe ba imi iha valór ne’ebé boot no imi mós implementa duni,” nia afirma.
Entretantu jornalista ne’ebé tuir formasaun kona-ba Digital and Physical Safety Training hamutuk na’in 15, husi hirak ne’e hotu sente apresia no agradese ba AJTL tanba sira bele hetan esperiénsia foun husi estrutura AJTL ne’ebé sai hanesan treinadór/a hodi fasilita membru AJTL sira durante loron rua nia laran.
Jornalista : Ekipa MediaMudansa
Editór : Orlando Magno
