(Dili) Mudansa – Membru Parlamentu Nasional (PN) deputadu Felis da Costa “Anin Buras” informa, Lei Kódiku Autór ne’ebé dadaun ne’e eziste, la autoriza ka bandu empreza estranjeiru halo produsaun kopia tais iha Timor-Leste.
“Ita ko’alia kona-ba ida-ne’e, kompeténsia governu nia, atu haree filafali ba lei kódigu autór oinsá atu prevene xina sira labele kopia ita-nia tais timor, atu tama fali ba ema sira ne’ebé iha fábrika,”dehan Deputadu Anin Buras ba jornalista iha PN, kuarta, 18/01/2023.
Anin Buras haktuir, governu tenke haree no halo kontrolu didi’ak, nune’e nasaun seluk labele uza Timor-Leste nia produtu rikusoin ne’e sai fali hanesan sira-nian.
Iha Fatin hanesan, Deputadu Patrocino Fernandes relata, kona-ba tais modelu originalidade iha loja xineza ida-ne’e sira hetan husi ne’ebé, presiza buka hatene katak tais ne’e dala ruma produtór timoroan sira mak lori ba fa’an iha Xina sira depois sira fa’an fali, Tanba Timor-Leste iha sistema merkadu livre.
Maibé kona-ba se maka kopia tais timor nian, ida ne’e depende ba governu atu interpreta Lei kódigu autór tanba estadu labele bandu xineza sira fa’an, tanba Timor-Leste adapta hela sistema merkadu livre.
“Depende ba governu, atu kontrola tuir lei, hodi haree ida-ne’e, karik sira konsege kopia ita-nia tais sira sai modelu hanesan orijinál, ne’e haree tuir lei kodigu autór ne’e para bele kondena sira ou bele mós bolu atensaun ba sira katak ita bandu buat sira-ne’e, ida ne’e governu nia responsabilidade,”afirma nia.
Jornalista : Ekipa Media Mudansa
Editór : Orlando Magno