(Dili) Mudansa – Relasiona ho kazu, rai arma brankas iha uma, Deputadu Felis da Costa “Anin Buras” ezije autoridade judisiál liuliu Ministériu Públiku ho juis sira iha Tribunál tenke brani foti desizaun bazeia de’it ba lei númeru 5/2017 inklui kódigu prosesu penál, maibé ohin 18/01/2023 Tribunal distritál Dili liberta eis ministru interiór Longuinhos Monteiro.
“Ema ne’ebé komete kazu hanesan ne’e tenke kondena nia makas, tanba ita haree ema ki’ik sira ne’e kumpre no respeita lei, maibé boot ne’e maka husik pasiar hela de’it ne’e la loos,”hatete nia.
Anin Buras informa, Longuinhos Monteiro mós ema ida ne’ebé uluk asumi ona kargu Komandante Jeral PNTL inklui sai mós governante ida, iha momentu ne’ebá nia lori lei hodi hanorin povu atu bele halo tuir, maibé ikus kuandu mandatu remata, nia maka subar fali arma sira ne’e.
“Hahú husi prokuradór jerál repúblika to’o iha juis sira ne’ebé iha Tribunal tenke brani, labele kaer tiha lei, ta’uk fali atu ba implementa,” afirma nia.
Iha fatin hanesan, Deputadu Bankada CNRT Patrocinio Fernandes hatete, iha lei arma brankas inklui kódigu penál mós ko’alia prosesu ida ne’e oinsá mak halo kombate, tanba ne’e Longhuinhos Monteiro tenke responsabiliza ba nia aktu krime ida-ne’e.
“Ha’u hanoin aktu ida ne’ebé rai subar arma iha uma ne’e krime, no iha ita-nia rai, krime ema ida-idak responsabiliza ninia aktu ne’e,” Patrocino relata.
Nia hatutan, nu’udar reprezentante povu inklui mós hanesan kuadru ida iha partidu CNRT hakarak husu atu autoridade judisiáriu halo sira-nia servisu ho imparsialidade no profisionál atu rezolve problema sira ne’e ho didi’ak nune’e labele kria paniku iha sosiedade nia let.
Sorin seluk, Defensór Públiku, Fernando Lopes de Carvalho hatete, dadaun nee Tribunal Distrital Dili deside liberta Eis Komadante Jerál PNTL Longuinhos Monteiro tanba asaun buska no aprensaun husi Polísia Sientífika no Investigasaun Kriminál (PSIK) ba arma ne’e ilegál.
“Ohin hatete dehan buskas no aprensaun ne’e tenkesér bazeia ba mandadu tribunál nian, tribunál mak bele hasai despaisu para bele kaer ema halo buska ba ema nia domisiliáriu e halo aprensoens ba ema nia sasán, ne’e tribunál nia kompeténsia, tribunál hatete katak kapturasaun ne’ebé mak foin dadaun halo ne’e laiha fragante delitu Tanba ne’e maka ohin Tribunál deside katak, liberta totál Longuinhos Monteiro,” afirma nia.
Asaun buska ne’ebé hala’o husi ekipa konjunta iha loron segunda (16/01/2023) ne’e envolve husi Forsa Polisia Nasional Timor-leste (PNTL), liuhusi Servisu Informasaun Polisia (SIP), no FALINTIL Forsa Defeza Timor-Leste (F-FDTL), no Servisu Informasaun Militár (SIM/J2), Polisia Militár (PM) konjunta ho Polisia Sientífika no Investigasaun Kriminál (PCIC-Sigla Portuges), halo buska no apreensaun domisiliária bá eis Komandante Jeral PNTL ninia rezidénsia iha Likisá, tanba deskonfia rai subar arma brankas.
Nune’e iha prosesu buska ne’e, konsege deteta Pistola Lot-9789 Made by Germany+Carregador ida ho bala hitu (7), totál (1). Kilat Air Force, Made in US, Model R-1212 totál 1. Kilat Marauder 177-Cal/4.Smm 2500 Psi (1). Kllat Sam Yang ind.co. Made in Korea, Golden Sayer air rifle Mud 700.cal.4,55mm (1). Kilat Rama, Horton Special edition, Made in US, B59748 (1).
Munisoens Real Mi6 (309), Munisoens Kaliber-12 (2), Munis0ens Pistola Glock 19 (1,496), Munisoens Simulada Mi6 (160), Munisoens Klat Vinte Dois (22) (11), Munisoens Broning Ro’o (3), Rama One Red Zone 2219 (2), Bomba Kilat (3), Munisoens Maujer (6), Munisoens SKS (29), Munisoens J3 (168), Munisoens Boracha (19), Munisoens simulada Metra (99), Munisoens Kaliber 22 (11), Progetil M16 (1).
Jornalista : Ekipa Media Mudansa
Editór : Orlando Magno
