(Dili) Mudansa – Koordenadór Edukasaun no Publikasaun HAK, Sabino Mendonsa informa, despaisu Ministeriu Edukasaun Juventude no Desportu (MEJD) ne’ebé atu taka Eskola Tekniku Vokasiona 3 iha Ermera sai impaktu boot ba estudante sira tanba prosesu aprendizajen agora la’o hela
“Despaisu husi MEJD taka eskola Teknika Vokasional 3 hanesan ESTV Calbale Lauana Lete-Foho, ESTV Raicala Ermera no ESTV Reman Bote Atsabe ida ne’e ita atu tau estudante sira ba iha ne’ebé, tanba eskola EBF iha munisípiu sira barak mak aat no kada sala númeru alunus barak liu fatin la sufisiente ba sira atu aprende ho di’ak.” Dehan Koordenador Edukasaun no Publikasaun HAK, Sabino Mendonsa ba Jornalista Media Mundasa iha nia knaar fatin HAK Farol Dili,Kinta, 18/01/2023.
Sabino esplika, Taka tiha ESTV 3 ne’e, estudante sira ba eskola seluk númeru alunus aumenta no sala ida estudante bele to’o 100, maibé ESTV ne’e di’ak tanba ema ne’ebé remata nia estudu iha ESTV bele kria rasik servisu ba nia an, iha Timor no hamenus dezempregu iha rai laran.
Koordenadór Sabino hatutan, Tuir kondisaun mínimu ne’ebé iha ona ne’e hadi’a la’os taka fila fali, serake ESTV loke iha tinan 2018, durante tinan hira ne’e MEJD ba ne’ebé?
“Sira permite loke ESTV Foun iha Suai, ESTV iha ona kondisaun mínimu bele hadi’a no investe liuliu iha fasilidade no infraestrutura nian la’os atu taka, se taka tiha Eskola vokasionál estudante sira agora eskola hela ne’e atu ba ne’ebé? Estadu mak investe Orsamentu ne’e ladún favoravel .” Nia subliña.
Nia relata, estadu tenke kria kondisaun nafatin no mós iha devér atu haree kondisaun eskola inklui haree situasaun sira hanesan ne’e atu labele sai impaktu ba estudante ne’ebé hala’o hela sira nia estudu iha ESTV Ermera.
Iha sorin seluk, Diretor Edukasaun munisípiu Ermera Eduardo Martins argumenta, Eskola 3 hetan Despaisu husi governu katak atu taka, tanba MEJD konsidera eskola tolu ne’e la prienxe rekezitu.
“Bainhira governu atu taka tenke hanoin didi’ak lai, bainhira atu estabelese eskola sira ne’e liu husi prosesu, ho ida ne’e, Governu suspende eskola atividade ensinu aprendizajen nian entaun la’os atu rezolve problema, maibé sei aumenta liután problema no fó impaktu ba estudante sira.”Eduardo Martins lamenta.
Jornalista : Delfina Borges
Editór : Orlando Magno
