(Dili) Mudansa – Eskola Ensinu Báziku Filial (EBF) 1 2 Zulo Taz postu administrativu Zumalai munisípiu Kovalima kondisaun Grave ne’ebé hetan estragus husi dezastre naturais (Anin boot) ne’ebé durante ne’e akontese iha territóriu laran inklui munisípiu Kovalima.
Koordenadóra EBF Zulo Taz Emilia Soares Lemos Barreto informa, EBF Zulo Taz hetan estragus impaktu husi anin boot ne’ebé akontese iha loron 03/01/2023.
“Uma Eskola EBF Zulo Taz ne’ebé hetan estragus husi anin boot ne’e, akontese iha loron 03/01/2023, rezulta kaleen uma eskola nia nakloke no mós piku balu monu tanba anin mai ho volume boot,” dehan Koordenadora EBF Zulo Taz Emilia Soares ba Media mudansa iha nia rezidénsia Zulo Kovalima, 08/01/2023.
Emilia konta, Anin hahú mosu iha ne’e hahú iha loron 28/03/2023 maibé ho volume ne’ebé ladún makas,foin lalais iha tersa 03/01/2023 mak anin mai ho volume boot hodi sobu uma eskola EBF Filial Zulo Taz.
“Sasan eskola nian ne’ebé hetan estragus husi akontesimentu ne’e maka hanesan bebak/piku, ai uma nia, kaleen tahan balu no mós livru balun tan iha momentu akontesimentu ne’e la’ós anin de’it maibé akompaña mós ho udan,” Emilia haktuir
Nia afirma, hafoin akontesimentu ne’e akontese iha tersa feira 03-01-2023 até agora husi Ministeriu relevante seidauk haree direita.
“Husu ba ministériu Edukasaun Joventude Desportu (MEJD) atu tau kestaun ba preokupasaun ne’ebé ami hasoru nune’e ami sente seguru bainhira hala’o prosesu aprendizajen iha aula laran,” nia rekomenda.
Iha sorin seluk, Diretor Edukasaun munisípiu Kovalima Rui Amaral Suri Seran hatete, durante anin boot iha Kovalima totál eskola ne’ebé hetan estragus hamutuk eskola 4 inklui EBF Zulo Taz.
“Iha fulan dezembru tinan 2022 nian, iha munisípiu Kovalima ita iha eskola 4 mak hanesan EBC Bulu, EBF Zulo Taz, EBF Dato Moris no EBF Aitos Fohoren mak hetan estragus husi dezastre naturais, tanba ne’e ami hato’o ba iha Ministeriu atu nune’e bele apoiu lalais ba preokupasaun Sira ne’e,” Rui Amaral relata.
Rui argumenta, MEJD tenke foti lalais desizaun hodi halo intervensaun ho urjente, atu nune’e labele fó impaktu ba estudante sira tanba agora eskola sira prepara ona atu tama ba prosesu aprendizajen tinan 2023 nian.
Nune’e mós Reprezentante UNICEF iha Timor-Leste Billal Durrani akresenta, Dezastre naturais no situasaun emerjénsia sira seluk bele akontese iha kualkér tempu, no bainhira akontese iha eskola sira, tenke preparadu hodi responde ho seguru no efetivu.
“Ita presiza asegura ita-nia resposta ba rekuperasaun tuir tempu, atu nune’e situasaun emerjénsia Ia fó impaktu ba labarik sira hodi lakon aprendizajen iha tempu naruk,” Billal dehan.
Nia haktuir, Material ne’ebé apoiu ba MEJD mak hanesan lona, kaleen zinku, pregu, ai kuadradu, pensu hena, no materiál aprendizajen nian, no mós Tinan ida ne’e UNICEF sei suporta Ministeriu hodi sosa materiál rezerva ba situasaun emerjénsia ne’ebé bele distribui no uza imediatamente bainhira mosu situasaun emerjénsia iha futuru.
“Agora daudaun UNICEF fó apoiu ba Ministeriu Edukasaun Juventude no Desportu halo ezbosu Opsaun Politika, atu responde ba emerjénsia iha futuru liuliu iha Setor Edukasaun nian iha Timor-Leste,” nia Argumenta.
Iha fatin la hanesan, Diretor Jeral Administrasaun finansas MEJD Antoninho Pires informa, MEJD orgullu tebes tanba bele hetan apoiu materiál emerjénsia hirak ne’e inklui materiál ijiene, materiál ensinu no materiál aprendizajen husi UNICEF, ba prosesu rekuperasaun iha eskola 15
“Material emerjénsia hirak ne’e, sei suporta eskola sira hodi bele aselera prosesu rekuperasaun nian, iha tempu badak hodi resposta ba preokupasaun ne’ebé dadaun ne’e eskola sira hasoru,” Tenik nia.
Tuir dadus husi MEJD durante Udan no anin boot ne’ebé akontese foin lalais halo estragus ba eskola Ensinu Baziku hamutuk 15 iha munisípiu Kovalima, Aileu, Ainaro, Bobonaro, Ermera, Lautem no Vikeke.
Jornalista : Ekipa Media Mudansa
Editór : Orlando Magno
