(Dili) Mudansa – Kampu servisu ki’ak/menus liu iha nasaun Republika Demokratika Timor-Leste (RDTL) halo Timor oan barak inklui Armando Hornai da Costa Lopes hakarak servisu iha ema nia rai tanba nesesidade uma laran obriga atu responde.
Traballadór Armando Hornai da Costa Lopes informa, nia deside Husik família iha Timor Leste hodi ba buka moris iha ema nia rai tanba iha Timor Leste kampu servisu la iha ba sidadaun sira atu hetan lukru uitoan hodi sustenta nesesidade uma laran.
“Hau hakarak ba servisu iha Austrália tanba kampu traballu iha Timor Leste menus loos, kampu traballu iha maibé saláriu mínimu atu sustenta ba ita-nia nesesidade ne’e susar tebes ho hirak ne’e mak ha’u hakarak ba servisu iha Austrália hodi ba buka moris,” Dehan traballadór Armando Hornai ba jornalista iha salaun DNEE Bekora Dili, kuarta feira 04/01//2023.
Armando haktuir, Bainhira hetan oportunidade ida ne’e, nia sente kontente tebes atu aproveita oportunidade ne’e, tanba ema barak mak hakarak hodi ba servisu iha ema nia rai maibé balu to’o agora la hetan oportunidade ida ne’e.
“Iha parte ida ha’u mós triste tanba husik hela ha’u-nia família sira, buat saida mak ami aprende iha ema nia rai fila mai ha’u sei aplika fila fali iha ita-nia rai tanba ami servisu iha Autralia durante fulan sia nia laran,” Armando relata.
Nia afirma, antes atu hetan oportunidade ida ne’e dezafiu Barak mak nia hasoru maibé dezafius hirak ne’e la hamate ninia espíritu vontade , Maibe dezafius hirak nee halo nia esforsu an liu tan.
“Primeiru iha Tinan 2019, ha’u tuir teste fíziku Austrália nian la Liu maibé ha’u nafatin kontinua ba tuir formasaun to’o teste ida Foin lalais iha tinan 2022 ne’e mak ha’u hetan fali oportunidade ida ne’e signifika hau liu,” katak Armando
Armando mós mós hanesan alumni Universidade Nacional Tomor Lorosae (UNTL) departamentu informátika iha ne’ebé Armando hetan graduasaun iha Tinan 2018.
Jornalista : Domingas Viana
Editór : Orlando Magno
