(Brazil) Mudansa – Prezidente Republika, José Ramos-Horta, deklara ninia prezensa iha Brazil la’os atu husu apoiu finanseiru, maibé hato’o soliedariedade bá Prezidente Luis Inácio Lula da Silva.
“Imi lalika preokupa demais ho Timor-Leste, ha’u la mai iha ne’e buka apoiu finanseiru, mai hatudu ha’u-nia soliedariedade, lori povu Timor-Leste nia naran, ha’u-nia kolega líder sira, atu bá oin ita halo kooperasaun,” dehan Xefe Estadu iha Brazil, segunda 02/01/2023.
Àrea estretéjiku ne’ebé Prezidente Ramos-Horta prefere atu koopera ho Brazil mak iha seitór agrikultura, edukasaun no justisa.
“Ezemplu iha argikulrua, Brazil nasaun ne’ebé halo konkorénsia maka’as, sira exportador mundiál ba produtu ai-han nian bá Amerika, Àfrika, Xína, ita iha Timor-Leste m mós halo importasaun manu, entaun Brazil bele fó matenek, oinsá mak Timor-Leste totalmente auto sufisiénsia no garante seguransa alimentar,” hateten Prezidente Horta.
Iha àrea siénsia no teknolojia, Prezidente Horta hakarak atu dezenvolve projektu triangular.
“Ita bele halo kooperasaun triangular, Brazil bele tau teknolojia, Brazil ho Timor-Leste halo kontaktu ho Brazil no Uniaun Europeia, Japaun mak finansia ho osan, ne’e bele halo, ne’e la’ós urjente, primeiru haree ba Brazil nia situasuan interna, la ansi,” akresenta Prezidente Repúblika.
Relasiona ho dezafiu ba mandatu Xefe Estadu Brazil, Prezidente Ramos-Horta hateten, estabilidade polítika no ekonómika tenke sai ajenda ba Prezidente Lula.
Tanba tuir Xefe Estadu, situasaun ekonomia agrava dezde tinan 2008 durante mandatu Prezidente Dilma Rossseff to’o Jair Bolsonaro, koinsidénsia ho situasaun ekonomia mundiál, polítika interna no pandémia COVID-19.
“Nia (Lula) tenke hadi’a situasaun finanseira, ekonomia Brazil nian, situasaun difísil teb-tebes, mal administrasaun, ne’ebé Bolsonaro (Jair Bolsonaro) halo tinan haat nia laran, hanesan, ekonomia Brazil monu a’at los, monu fila-fali ba extrema pobreza, milloens ba milloens ema ne’ebé hamlaha, probreza aumenta iha tinan haat nia laran, situasaun ne’ebé kuaze elimina iha tempu Lula nian,” konsidera Xefe Estadu.
Ramos-Horta hateten, susesu Lula iha tinan 10 liu ba durante mandatu dahuluk no daruak, bele sai referénsia.
“Brazil sai Paíz devedór boot liu iha mundu, besik ona Lula nia mandatu, nia selu divida hot-hotu, inklui sai kredór, tau osan ba Fundu Monetáriu Internasionál – FMI no kuandu nia remata ninia segundu mandatu, Brazil nia osan trezentus billoes dolares,” hateten Prezidente Horta.
Relasiona ho konflitu iha entre Russia no Ukránia, Xefe Estadu deskuti ona ho Celso Amorin hanesan Asessór Prinsipál Prezidente Lula da Silva no Sekretária Jerál Ministériu Relasaun Exterior Brazil atu buka solusaun.
“Sé Prezidente Lula iha tempu karik, tau-matan ba solusaun iha Ukránia no tau matan oinsá, ha’u fo ideia, Brazil mesak labele, depois ita haree Estadus Unidus labele sai mediador, tanba partisipa direta iha konflitu, Europeu sira mós partisipa direta iha konflitu, ne’e ha’u la krítika, Europa no Amérika, kuandu Rúsia invade Ukránia, Amérika no Europa labele hamri’ik haree de’it,” Argumenta Prezidente Horta.
Tuir Xefe Estadu, Brazil hamutuk ho Índia, Indonézia, Turkia no Xína hodi buka solusaun, liu hosi konvoka reuniaun iha Índia ka nasaun seluk, hodi rezolve konflitu ne’e, tanba paíz hirak ne’e la envolve direta iha konflitu no iha relasaun di’ak ho Rúsia no Estadus Unidus Amérika.
Jornalista : Ekipa MD
Editór : Orlando Magno
