(Angola) Mudansa – Prezidente Repúblika, José Ramos-Horta ho nia omologu Prezidente Angola, João Lourenço segunda-feira ne’e, hasoru malu iha Hotel Royal Tulip Brazília, ne’ebé ko’alia liu kona-ba kooperasaun bilaterál entre nasaun rua, oportunidade atu halo investimentu iha ASEAN inklui loke Embaixada Angola iha Dili.
“Ministru Negosiu Estranjeiru Angola sei mai vizita Timor iha tempu badak no Prezidente Angola mós hakarak vizita, tanba nunka Prezidente Angola ida mai Timor-Leste no sira sei hare loke embaixada ida”, dehan Prezidente Republika José Ramos-Horta hafoin enkontru ho prezidente angola.
Tuir Xefe estadu, Angola hanesan produtór petróleu, ho kuantidade barríl millaun rua kada loron, produtór diamante, osan-mean, karvaun no seluk tan no empreza angolana balun mós investe ona iha Xina no sai proprietária ba rezidénsia andár 20 to’o 30 iha Singapura.
Tanba ne’e, kona-ba ASEAN, Xefe Estadu dehan, adezaun Timor-Leste ba ASEAN, sei sai hanesan plataforma investimentu ba nasaun membru CPLP sira.
“Timor-Leste iha tempu badak, 2023, 2024, 2025, bele tama iha ASEAN, bele sai hanesan plataforma ida, para rai sira hanesan Angola, Portugál, Brasil, bele halo investimentu, koloka sira-nia produtu iha Timor-leste, rai sira-ne’e iha meius indústria, bele uza Timor-Leste hanesan plataforma, hodi halo reesportasaun ba nasaun sira iha ASEAN,” fundamenta Xefe Estadu.
Prezidente Ramos-Horta afirma, Timor-Leste bele sai hanesan armazén ba tranzasaun produtu hanesan modelu komérsiu ne’ebé Singapura opta, hodi akomoda produtu importadu husi nasaun seluk.
“Brazil ha’u husu ba sira loke fábrika medikamentu, Portugál loke fábrika medikamentu, indústria modas, ropa, tanba Portugal ein termus indústria moda nian, boot tebetebes iha mundu, halo sapatu ho kualidade, agora Portugál númeru daruak, hafoin Itália no Timor-Leste bele sai hanesan armazén ba produtu sira-ne’e hotu, hodi fa’an filafali ba nasaun seluk,” salienta Xefe Estadu.
Tuir Prezidente Repúblika, enkontru ho lider no entidade importante sira iha eventu internasionál sira, hanesan parte integrante iha diplomasia no Timor-Leste tenke ativu liután.
“Ha’u hasoru malu mós ho Vise Ministru Edukasaun Singapura, foin lalais hasoru malu iha Singapura, nia mai Timor-Leste, hasoru malu mós ho delegasaun husi Kambodia, hasoru ho vise Prezidente Kuba mós mai no delegasaun lubuk ida,” tenik Xefe Estadu.
Jornalista : MD
Editór : Orlando Magno
