(Kovalima) Mudansa – Akontesimentu anin boot ne’ebé dadaun ne’e sirkula iha Timor-Leste, rezulta uma kain 6 iha Zulo knua, suku Zulo postu Administrativu Zumalai Munisipiu Kovalima.
hafoin Akontesimentu ne’e akontese ohin 03/01/2023, oras tuku 08 ho balun dadeer, Xefe Suku Zulo ho Xefe aldeia inklui akompaña husi PNTL Eskuadra Zumalai to’o kedas fatin akontesimentu hodi alista vítima sira nia naran no komunika kedas ba parte relevante tanba vitima sira buka hela fatin seguru atu hela durante anin boot sei iha.
Vítima Dezastre Fernanda Cardoso informa, Antes Akontesimentu ne’e akontese vítima dezastre Fernanda ho nia laen no nia oan sira tuur hela iha uma laran, maibé derrepente de’it anin ne’ebé mai ho nia volume boot to’o sobu tiha uma ne’ebé sira hamahan an.
“Ami tuur hela iha uma laran derrepente anin boot mai loke sa’e kaleen parte oin ne’e mak ami hakfodak halai sai husi uma laran hodi buka fatin seguru,” dehan Fernanda ba MediaMudansa iha nia hela fatin Zulo Kovalima, tersa 03/01/2023.
Fernanda haktuir, anin boot ne’e mosu hahú iha loron 28/12/2022, volume anin la dun boot maibe horsehik no ohin loron mak volume anin aumenta hodi sobu uma hirak ne’e.
“Anin sobu tomak ami nia uma entaun hakarak ka lakohi ha’u ho família tenke buka fatin ne’ebé seguru hodi hela provizóriu to’o anin para mak hadi’a fali ami nia uma hodi hela,” Nia realsa.
Fernanda rekomenda, husu ba parte relevante liuliu protesaun Sivil iha munisípiu Kovalima atu tau kestaun problema ne’ebé sira enfrenta nune’e mós nia husu apoiu urjente hosi prepara fatin provizóriu ba sira hodi hela.
Iha sorin seluk, Xefe Suku Zulo Postu administrativu Zumalai Munisipiu Kovalima João Lopes de Carvalho relata, Hafoin akontesimentu ne’e akontese Xefe suku Zulo ho ekipa seguransa no mós xefe aldeia to’o kedas fatin akontesimentu hodi rejistu ba vítima dezastre sira iha knua Zulo suku Zulo.
“Ohin ami foti ona dadus provizóriu hamutuk Uma kain 6 mak hetan estragus, problema ne’e ha’u hato’o ona diretamente ba koordenadór Protesaun Sivil munisípiu Kovalima, tanba ne’e aban 04/01/2023 ekipa sei tun direita mai Zulo knua,” Xefe suku João akresenta.
João argumenta, Uma ne’ebé hetan estragus hanesan kaleen tahan rua ka tolu mak nakloke sira seidauk halo rejistu maibé depende ba koordenadór Protesaun Sivil munisípiu Kovalima fó orientasaun.
“Horseik, 02/01/2023, iha aldeia Obuk-mil anin sobu totál uma kain rua no ohin loron 03/01/2023 iha aldeia Obuk-mil aumenta ida, iha aldeia Zulo Taz ida no mós iha aldeia Lale uma kain rua maka hetan estragus husi anin boot ne’ebé akontese iha Zulo knua tanba ne’e Vitima dezastre sira tenke hela lai ho sira nia família hodi hein rezultadu husi Protesaun Sivil,” João hatete.
Tuir Informasaun ne’ebé Jornalista MediaMudansa akumula iha terenu katak, dadus provizóriu iha Zulo Knua suku Zulo postu administrativu Zumalai Munisipiu Kovalima uma ne’ebé hetan estragus totál husi anin hamutuk, uma kain 6 no mós uma ne’ebé maka kaleen tahan 2 ka tolu nakloke kuaze 10 resin inklui Ensinu Baziku Filial Zulo Taz.
Jornalista : Ekipa Media Mudansa
Editór : Orlando Magno
