(Lautem) Mudansa – Juventude ne’ebé hamahan an iha Asosiasaun Juventude Estudantil Suku Baduro (AJESB), ho inisiativa Rehabilita Eskola Pre-Eskolar Baduro, ohin (2/01/2023) remata no entrega ba autoridade lokál no no Diretor eskola.
Reprezentante inan-aman, Zil Correia, orgullu ba juventude sira bele kolabora malu, hodi hadi’a Pre-Eskolár refere no konsidera hanesan ezemplu ida.
“Ita-nia juventude (AJESB), ho esforsu tomak reabilita Pre-Eskola, ohin sira remata, ita orgullu agradese. uluk ita-nia oan sira tuur de’it iha rai, maibé ohin loron sira bele tuur ona kadeira no eskola ne’e bele pinta hikas liu husi inisiativa AJSB nu’udar maun ba nia alin sira, ami inan aman apresia tebes ba sira nia karidade ida ne’e, ” dehan Zil Correia ba jornalista MediaMudansa iha pre-eskolár Baduru Lautem, Segunda 02/01/2023.
Oportunidade ne’e, Zil Correia espresa mós nia lamentasaun balun tanba iha serimónia entrega la iha autoridade Suku ne’ebé marka prezensa hodi agradese servisu juventude AJSB.
Iha fatin hanesan, Veteranu Tomas Pires “Upuratu”, husu ba inan aman no profesór/á sira kuidadu Pre-Eskolar ne’e no hanorin ita-nia oan sira ho di’ak, tanba sira maka futuru ba nasaun nian
“Ba Inan-Aman sira kuidadu eskola ida ne’e halo didi’ak, eskola Pre-Eskolár ida ba futuru ita-nia oan sira nian, husu mós ba mestre sira hanorin didi’ak ita-nia oan sira, ita dehan futuru nasaun, sira ne’e maka futuru ba ita-nia nasaun nian,” Tenik Veteranu Upuratu.
Veteranu ne’e hato’o mós nia preokupa no husu nafatin ba AJESB hodi esforsu hadi’a nafatin fasilidade balun ne’ebé maka sei falta, hanesan bee, hariis fatin no hirak ne’ebé sei presiza halo kompletu
Prezidente AJESB Olderico Soares haktuir, AJESB Mai ho nia prinsípiu progresu atu kontribui dezenvolvimentu iha suku laran liuliu parte edukasaun.
“Ami Hatan apoiu husi inan-aman no veteranu sira. Katak ho prinsípiu ne’ebé maka iha, atividade lubuk ida ami prontu hala’o maibé ita haree mós ba ita-nia fundus, nune’e agradese no apresia ba laran luak kompañia sira ne’ebé apoiu ita ho fundus ba reabilita Pre-eskolar ida ne’e hamutuk, $850.00 inklui fundus AJESB nian ne’ebé antes ne’e iha ona, ” Subliña Olderico.
Nia konta, Materiál sira ne’ebé AJESB utiliza hodi reabilita no oferese ba Pre-Eskola ida ne’e maka hanesan, Kadera 30, Meza 15, Rede Janela 21, Tinta 2, Pregu 5-7 míl 20 Kg, Roller no sementi, AJESB hetan Apoiu fundus husi telekomunikasaun Timor Telecom (TT) ho osan montante $630.00, no Kompanhia BTK, $100.00.
Reabilitasaun ne’e hala’o durante semana rua ba eskola refere, ne’ebé lokaliza iha Suku Baduro, Postu-Administrativu Lautém, Munisípiu Lautém.
Entretantu, tuir dadus Pré-Eskolár Baduro re-inisia iha tinan 2020 no estudante hamutuk 38, hanorin husi Professór no Professora voluntáriu hamutuk na’in 4.
Jornalista : Azelio da Cruz
Editór :Orlando Magno
