(Dili) Mudansa – Domin ba oan no bei-oan sira nunka mihis maski idade avansadu ona maibé nafatin esforsu an hodi suporta nesesidade uma laran no mós nesesidade ne’ebé bei-oan sira presiza tanba lakohi bei-oan sira fihir de’it ema nia susesu.
Avo feto nee hatais faru kor makerek kabala ho lipa kor matak riska riska, hatais sinelus kor azul no mutin tara pasta metan aproveita liman kuana hiit Kerupuk neebe falun ona iha platiku, liman karuk hiit Forerai hodi lao iha estrada ninin diresaun Palasiu Governu no Motael.
Situasaun ne’e akontese ba Avo ferik Elsa Amaral Guterres ho idade 81, hanesan mós Negosiante fa’an fore rai no krupuk la’o hale’u sidade Dili tanba ninia produtu la folin iha merkadu Taibesi atu sustenta Nia Moris, no mós ba ninia bei-oan sira.
Inan faluk Elsa Amaral Guterres orijen Husi Kraras Aldeia Ai-sahe suku Bibileo postu Administrativu Viqueque Municipiu Viqueque maibé hela iha Dili dezde iha Indonesia nia tempu.
Avoo Faluk ne’e iha oan na’in 6 kompostu husi Mane na’in 4 no feto na’in 2 maibé hirak ne’e hotu la Servisu, Dala ruma Ema bolu ba kee Haris Fatin, kee posu no halo Uma mak sira foin hetan osan.
“Hau Hela iha Uma Taibesi, maibé Uma ne’e merkadu, Hau atu fa’an iha merkadu maibé Fatin atu fa’an laiha no ha’u-nia produtu la folin Tan ne’e Hau lori fore Rai ho krupuk ne’e Lao ba fa’an iha fatin fatin,” dehan Avo Elsa ba Media Mudansa iha areadores Jardin 5 de Maiu Dili, Kuarta 28/12/2022.
Nia haktuir, fa’an hanesan ne’e atu sustenta família uma laran tanba Avo Elsa nia la’en mate tiha ona iha 1990 entaun la iha ema ida mak atu sai responsavel ba sira nia uma laran ho ida ne’e hakarak ou lae avoo Elsa mak tenke responsavel ba uma laran ne’e.
“Hau fa’an fore rai, sate, Hepiden, susu been, kafé no sasán ki’ik Sira ne’e hahú iha tinan 2004 maibé agora Hau fa’an de’it fore Rai ho krupuk, tanba oan barak no bei-oan barak tanba ne’e ha’u husu ba governu bele ka lae fo hela rai pedasuk oan ida mai ami nune’e ami bele harii mahon ida hodi hela hakmatek buka moris,” nia rekomenda.
Iha sorin seluk, Negosiante Elsa nia bei-oan, Livaldina Soares Guterres Milgue argumenta, Negosiante Elsa Amaral Guterres Hala’o negósiu la’o ain iha Cidade Dili tanba Fatin la iha atu atu Hala’o negósiu iha merkadu.
“Hau nia avoo ne’e nia rasik mak sosa sasán no nia rasik mak fa’an, sasán mak hanesan fore rai no krupuk, maibé dala ruma ami mós ajuda nia fa’an,” Livaldina konta.

Livaldina esplika, kada vés ninia avoo sai husi uma tuku 7:00 dadeer ou tuku 8:00, maibé la han matabixu, no meudia di’ak ida nia (Avo Elsa) mai han uma dala ruma mós nia la han iha uma.
“Ami iha uma ne’e hamutuk na’in 8 no sira seluk ba hala’o servisu no balu buka servisu, ha’u mak ho alin ki’ik sira iha uma tanba ha’u remata Sekundáriu iha ESG 4 de setembru iha tinan 2021, ha’u hakarak tebes atu kontinua maibé ekonomia mak la Forte atu kontinua iha Universidade,,” nia deklara.
Nune’e mós Livaldina husu ba parte governu atu ajuda liuliu ba iha uma ne’ebé hela ba, no mós nia husu atu ajuda nia nune’e bele kontinua iha nivel universidade nian.
Estajiadu MD : Zemidonio Martins
Editór : Orlando Magno