(Dili) Mudansa – Ahi han uma 50 resin iha área merkadu Taibesi, aldeia depózitu suku Lahane orientál postu administrativu na’in feto munisípiu Dili Deskonfia ema balu la hamate lilin antes sai husi uma.
Akontese ne’e mosu iha kinta feira 22/12/2022, tuku 23 ho balu rezulta ema balu kanek todan no mós la salva sasán uma laran maibé la iha ema ida mak lakon nia vida iha akontesimentu ne’e.
Vítima Eufrazia Dos Reis informa, feto ida mai kós iha Taibesi mak sunu lilin depois feto ne’e sai la hamate lilin ikus mai lilin rohan han tiha kulsaun to’o han motuk uma 50 resin iha fatin refere
“Mana ida sunu lilin ne’e, ninia paradeiru agora ami la hatene tanba nia halai lakon tiha ona, bainhira akontesimentu ne’e mosu ami la konsege salva sasán uma laran inklui dokumentu sira tanba ahi nia forsa aumenta ba beibeik,” dehan Vitima Eufrazia ba jornalista iha fatin akontesimentu Taibesi Dili, Sexta 23/12/2022.
Eufrazia haktuir, fiu eletrisidade tabele an tun sa’e halo sira trauma liu tan atu ba salva sasán no dokumentus iha uma laran sira kontaktu parte Bombeiru hodi hamate ahi ne’ebé han komunidade nia uma iha aldeia depózitu maibé iha primeiru la konsege hamate ahi ne’e tanba bee iha tanke karreta hotu.
“Ami uma kain hamutuk 50 resin mak estragus husi ahi, laiha ema ida mak mate maibé iha ema balun mak kanek agora evakua ona ba ospitál maibé ami nia preokupasaun boot liu ba iha ami nia dokumentus sira tanba tahan ida de’it mós agora la iha,” nia afirma
Eufrazia relata, parte kompetente liuliu ministériu ne’ebé toma konta ba dokumentus nia presiza halo atendimentu ba vítima insendiu sira ne’ebé lakon ona sira nia dokumentu iha momentu akontesimentu ne’ebé ema la espera atu akontese.
“Husu ba parte relevante karik bele halo atendimentu ba ami nia dokumentus sira ne’ebé ahi han hotu hanesan ijasa, kartaun eleitorál, BI no dokumentus sira ne’ebé ami hasai husi nivel edukasaun formál nian,” nia rekomenda.
iha fatin akontesimentu Ministeriu Administrasaun Estatal (MAE), Miguel Pereira de Carvalho deklara, nia parte to’o kedan iha fatin akontesimentu hodi hare direita uma hira neebe ahi han motuk ona no rona populasaun sira nia preokupasaun.
“Ohin dadeer ida ne’e ha’u mai diretamente iha terenu atu rona sira nia preokupasaun no intervensaun sira ne’e governu sei halo iha tempu primeiru, realiza ita-nia populasaun vítima sira ba iha fatin ne’ebé seguru hanesan Sede veteranus no mós iha Protesaun sivíl depois loron tolu tuir mai sei kontinua sustenta populasaun ne’ebé sai vítima,” Miguel esplika.
Miguel reforsa, Nia sei ko’alia ho autoridade munisípiu Dili relasiona ho asuntu refere atu tau matan ba vítima tanba merkadu ne’e atribuisoens no kompeténsia autoridade munisipál de Dili ninian tanba Akontesimentu ne’ebé horikalan akontese iha merkadu Taibesi rezulta uma kain 50 resin no membru família afetadu hamutuk 330.
Estajiadu MD : Zemidonio Martins
Editor : Orlando Magno
