(Dili), Mudansa – Prezidente Ezekutivu Fundasaun Cristal Agostinho dos Santos Gonçalves informa, Institutu Superior Cristal (ISC), ohin kompleta ona tinan 21, sira nafatin prontu fahe matenek ba ema hotu.
“Ohin ISC halo tinan ba dala 21, ne’e hanesan joven ne’ebé bonitu tan ne’e ISC prontu kontinua sai fatin fahe matenek ba ema hotu tanba ne’e parabéns ba ISC ne’ebé kompleta ona tinan 21,” dehan Prezidente EFC Agostinho liu husi nia diskursu hafoin remata misa asaun grasa no agradesimentu ba aniversáriu ISC, iha Salaun Fundasaun Cristal Balide Dili, 04/11/2022.
Prezidente EFC Agostinho haktuir, nia parte hato’o mós ba Magnifiku Reitor no Presidente Klibur Nasional Alumni Kristal inklui estudante sira tanba ema hotu nia kontribuisaun mak ohin ISC nia naran sai morin no koñesidu iha Mundu liuliu iha Timor-Leste.
“Husu ba Alumni Cristal ne’ebé namkari iha Timor bainhira lidera ita-nia dezenvolvimentu tenke lori pás no Dame, sai lider boot la bele ko’alia barak maibé tuir Kristu mate iha Kruz entaun lider mak tenke mate ba povu la bele povu mak mate ba lider sira,” Agostinho esplika.
Iha fatin hanesan Magnifiku Reitor ISC Sebastião Pereira relata, ohin realiza Misa kona-ba selebrasaun loron Aniversário Institutu Superior Cristal ba dala 21 hahú husi 05 Novembru 2001 to 2022.
“Ba Institutu ida ne’e, iha progresu maka’as, estudante ho dosente sira mós barak kuaze atus haat resin. Prova joven legál sira atu loke eskola hodi hadi’a nia vida atu di’ak tanba eduka ema atu sai ema tuir moto ne’ebé, atu lori edukasaun ba ema no lori ema ba edukasaun,” Reitor ISC Sebastião afirma.
Prezidente Klibur Nasional Alumni Kristal Jacinto Junior Oliveira mós hato’o nia parabéns ba Institutu Cristal liuliu ba fundadór/á Fundasaun Cristal ne’ebé kria ona Institutu ida ne’e hodi hamahan estudante sira ne’ebé gradua ona hahú iha tinan 2005 to’o agora.
“Ami hanesan termu nasionál antigu alunu Kristal nian, agradese tanba produtu sira ne’ebé mak agora daudauk iha kuaze okupa hotu kargu importante sira, inklui mós sira ne’ebé mak agora daudauk hala’o kargu Profisionál sira iha tuir ida-idak ninia área,” Prezidente KNAC realsa.
Nia dehan hahú iha tinan 21, Kristal kontribui lubuk ona ba dezenvolvimentu iha país ida ne’e alumni Cristal maioria hetan hotu servisu no balun sai membru governu.
“Lori Klibur Nasionál Cristal nia naran agradese ba Magnifiku Reitor no estrutura tomak ne’ebé durante ne’e serbisu maka’as tebetebes ba iha instituisaun ida ne’e hodi fó nafatin ita boot sira nia kontribuisaun ho moto katak, “Lori Edukasaun ba Ema no Ema ho Edukasaun,” ne’e katak fundasaun lori edukasaun ba ema no ohin loron Cristal lori ona ema ba Edukasaun,”Nia esplika
Tuir dadus ne’ebé média mudansa asesu, totál Dosentes no Profesores hamutuk atus tolu resin no Estudante ativu hamutuk kuaze rihun tolu hirak ne’e hotu konta husi Ensinu Baziku to’o Programa Mestradu ISC, no mós totál alumni Cristal hamutuk rihun limanolu resin resin.
Jornalista : Mediamudansa
Editór :Orlando Magno
