(Dili) Mudansa – Grupu deskoñesidu tuda rahun uma no Sona Kanek Vitima Agostinha José Pereira Neves iha área Balibar foho leten ne’ebé lokaliza iha Aldea Rai-kuak, Suku Lahane Osidental, Postu Administrativu Vera-Cruz, Munisipiu Dili.
Deklarasaun Vitima Agostinha José Pereira Neves nian, ne’ebé MediaMudansa asesu iha média ofisiál Servisu Relasaun Publik katak, durante ne’e Vitima Agostinha laiha inimigu ho ema se de’it tanba hanoin de’it servisu hodi sustenta moris maibé 07/11/2022 kalan, Agostinha hetan sona iha hasan parte karuk.
“Ha’u servisu cleaner iha otél Bidau ema sira ne’e ami ladún koñese maibé ha’u hare mane isin badak ida hakilar no uza besi meik sona tama ha’u-nia oin, ema ne’e nia lian ha’u deskonfia ami nia viziñu maibé ha’u lakohi du’un ema”, dehan Vitima Agostinha.
Agostinha informa, nia parte kondena maka’as ba hahalok krime ne’ebé akontese no husu PNTL buka tuir suspeitu hirak ne’ebé envolve iha kazu refere nune’e sira labele moris iha trauma nia laran.
Iha sorin seluk, deklarasaun husi vítima hanesan uma na’in, Wilson Jose Pereira Neves relata, asaun ne’ebé konsidera tentativa omisídiu akontese iha segunda (07/11), tuku 01h30 madrugada wainhira vítima hamutuk ho família sei deskansa (toba) hela.
“Ami hamutuk ho família toba hela derrepente ema komesa tuda fatuk ba uma leten no hakilar dehan “ne’e sete-sete imi halimar imi mate tan”, rona ida ne’e ami sente ta’uk hodi nonook de’it iha uma laran no ha’u rasik telefone kedas ba polísia husu ajuda. Maibé lakleur de’it iha oras tuku rua resin sira komesa mai besik falun oin ho sira nia faru uza sasán kro’at baku mate ahi oan iha ferik katuas nia rate oin no kontinua uza besi meik baku rahun vidru janela 3, no sona diman iha odamatan vidru rahun hotu sorte maun polísia sira mai lalais se lae sira tenta atu oho ami iha uma laran,” Wilson konta.
Nia afirma, wainhira grupu deskoñesidu ne’e halo asalta sira hare PNTL komesa sai hosi foho lolon mai nia sira konsege halai sa’e liu ba foho leten.
Hafoin akontesimentu ne’e akontese ekipa konjunta Servisu Informasaun Polísia Nasionál (SIPN-PNTL), hamutuk ho Servisu Informasaun Militár (SIM-F-FDTL), junta ho J2, Unidade Informasaun Falintil, S2, to’o kedas fatin akontesimentu hodi hakalma situasaun no transporta kedas vítima ba ambulánsia hodi hala’o tratamentu.
Parte SIPN mós kontaktu kedas ba Eskuadra PNTL Nain-Feto hodi rekolla informasaun no buka tuir autór sira ne’ebé envolve iha asaun brutál ne’e. Ho situasaun ne’e PNTL envolve BOP, COE no Eskuadra Nain-Feto hodi asegura vítima nia uma hodi garante hakmatek no halakon trauma ba ki’ik oan sira.
Tanba ne’e, Polisia Nasional Timor-Leste, nafatin buka tuir autór ne’ebé envolve iha kazu asaltu hodi hakanek vítima Agostinha Jose Pereira Neves, tinan 28 no tuda rahun uma iha área Balibar foho leten ne’ebé lokaliza iha Aldea Raikuak, Suku Lahane Osidental, Postu Administrativu Vera-Cruz, Munisipiu Dili.
Jornalista : Ekipa MediaMudansa
Editór : Orlando Magno
