(Kambodia), Mudansa – Universidade tolu, BELTEI International University, Kambodia Universidade no Paragon International University, fó doutoramentu onoráriu ba Prezidente Republika José Ramos Horta nu’udar rekoñesimentu ba kapasidade no kontribuisaun ba komunidade no mundu iha área oioin.
“Sira fó doutoramentu onoris hanesan rekoñesimentu ba ha’u-nia kontribuisaun iha área oioin iha relasoens internasionál, lideransa, jestaun konflitu no seluk tan,” dehan Xefe Estadu José Ramos-Horta hafoin simu títulu doutór onoris liu husi konferénsia imprensa iha Kambodia, Sexta 21/10/2022.
Prezidente Horta informa, Dotor onoris kauza ne’e hanesan diploma ida atu rekoñese ema ruma la’os estudante universidade, maibé nia kontribuisaun iha komunidade ka iha nasaun no mundu hanesan kualifikadu atu simu “dotór onoris kauza” ne’e,”.
Prezidente Repúblika Horta esplika, títulu ne’e kontribui mós ba fortalesimentu relasaun entre universidade sira ho personalidade sira husi instituisaun superiór iha Kambódia.
“Kuaze universidade hotu-hotu iha mundu halo ida ne’e liuliu atu hametin relasaun entre universidade ho elementu ka parsialidade ne’ebé sira fó grau akadémiku ida-ne’e, iha latín bolu “doutór Honoris Causa” iha tradusaun fasil maka doutoramentu onoráriu,” Horta deklara.
Partisipa iha serimónia atribuisaun doutoramentu onoráriu ba Prezidente Republika, José Ramos-Horta mak Ministru Edukasaun, Juventude no Desportu Kambodia, Hangchuon Naron, membru governu seluk no mós delegasaun husi Timor-Leste.
Jornalista : Ekipa MediaMudansa
Editór : Orlando Magno
