Estudante Keta Fó Sala Maromak – Profesores, Karik La Pasa Iha Ezame Nasionál

(Dili) Mudansa – Estudante sira tenke prepara an másimu hodi hasoru ezame nasionál nune’e to’o ikus la bele fó sala ba ema seluk bainhira la pasa iha ezame nasionál.

Lia hirak ne’e hato’o husi Ministru Edukasaun Joventude Desportu (MEJD), Armindo Maia ba jornalista, hafoin remata serimónia entrega pontus ezame nasionál ba diretór/á munisípiu sira iha Komoro Dili, kinta 20/10/2022.

“Ema ne’ebé esforsu an, maromak mós ajuda bainhira fiar mós ba maromak, maibé, ba sira ne’ebé la estuda la bele hanoin reza de’it, ikus la pasa fó sala  ba mestre no dala ruma maromak mós nia fó sala hotu,” Ministru Edukasaun Armindo informa.

Ministru Edukasaun Armindo haktuir, tinan ne’e, MEJD realiza ezame nasionál ba estudante sira husi Ensinu Basiku, Sekundaria no mós Tekniku Vokasional inklui Ensinu Rekorente, tanba ne’e MEJD husu estudante sira atu implementa matenek iha ezame nasionál.

“Ha’u husu estudante sira tenke estuda maka’as tanba ami fó buat ne’ebé imi hetan ona husi, nune’e iha ezame nasionál imi prienxe tuir buat ne’ebé imi hatene no esforsu hodi hatudu imi-nia kapasidade no matenek,” Armindo sujere.

Armindo relata, MEJD iha mekanizmu barak atu halo Inspesaun jerál oinsá bele implementa iha ezame nasionál ho rigór hodi atinji rezultadu ne’ebé di’ak.

“Profesór/á sira tenke hala’o imi-nia knaar nu’udar profesór, hodi halo fiskalizasaun durante ezame nasionál nune’e superviziona bele hala’o knaar ho di’ak,” Armindo esplika.

Nia afirma, MEJD haruka ona karta ba parte seguransa PNTL atu apoiu no antisipa situasaun iha tempu ezame nasionál, espera katak la iha buat ida maibé hanesan prevensaun de’it.

Entretantu tuir dadus ne’ebé média mudansa asesu, totál estudante ne’ebé tuir Ezame nasionál iha tinan 2022 hamutuk na’in 58.132 hirak ne’e hotu, kompostu husi Ensinu Baziku Terseiru Siklu 3.836, Sekundariu Jeral 22.525, Tekniku Vokasional 43. 039 ensinu Rekorente hamutuk na’in 382.

Jornalista : Ekipa MediaMudansa

Editór       : Orlando Magno