(Dili), Mudansa – Ministeriu Edukasaun Juventude Desportu (MEJD), presiza tau matan hodi atende emerjénsia ba eskola ne’ebé dadaun ne’e kondisaun aat hela tanba fatin la seguru ba estudante sira atu tuir ezame iha EBC Bulu postu Administrativu Zumalai Munisipiu Kovalima.
Relasiona ho Media Mudansa.info nia notísia ne’e, Ministru Edukasaun Joventude Desportu Armindo Maia husu ba Diretór Edukasaun iha munisípiu atu atende ba preokupasaun ne’ebé eskola sira hasoru iha munisípiu.
Armindo relata, Diretór/á edukasaun sira iha munisípiu tenke atende ba eskola nia preokupasaun tanba agora estudante sira besik ona ezame la bele hein de’it ministru mak atu ba rezolve lalais.
Tanba Ezame Nasional iha Timor-Leste tinan ne’e, sei realiza iha loron 24-26/10/2022, no kontinua ezame lokál iha loron 27-29/10/2022.
“Se buat hotu fila ba ministru entaun ita la hatene loos oinsá mak ministru fera ulun fatuk ba ida ne’e, tanba ita tau Diretor edukasaun sira iha munisípiu ne’e atu rezolve preokupasaun ne’ebé eskola sira hasoru iha munisípiu,” dehan Ministru Edukasaun Armindo Maia ba jornalista iha MEJD Vila-Verde Dili, segunda 17/10/2022.
Armindo haktuir, Kona-ba meza ho kadeira husi Ministeriu Edukasaun distribui ona ba eskola sira, karik eskola balun sei presiza tan meza ho kadeira ba ezame ida ne’e, MEJD prontu drop daudauk ba sira.
Armindo haktuir, nia parte garantia Diretor Edukasaun iha munisípiu no Diretór eskola sira iha kreatividade oinsá maka atu rezolve problema ne’e, tanba Elavorasaun pontus ezame prontu ona, hein loron 21/10/2022 MEJD distribui ona ba eskola sira iha rai laran atu estudante sira tuir ezame.
“Ezame nasionál tinan 2022 estudante finalista hamutuk 58.132 hirak ne’e hotu kompostu husi Ensinu Baziku Terseiru Siklu 3.836, Sekundariu Jeral 22.525, Tekniku Vokasional 43. 039 ensinu rekorente 382,” Armindo hakotu.
Jornalista :Ekipa MD
Editór : Orlando Magno
