(Dili), Mudansa – Ministeriu Edukasaun Joventude Desportu garantia sei rezolve hotu profesór/a voluntáriu no kontratadu nia preokupasaun iha tinan ida ne’e ho razaun sira hatama ona karta deste fulan juñu 2022.
Ministru Edukasaun Joventude Desportu, Armindo Maia informa, Kona-ba destinu profesór/á kontratadu besik 5.000, MEJD sei hato’o proposta ingresu espesiál maibé ida ne’e presiza lori ba Konsellu Ministru nune’e bele hetan rezultadu husi Konsellu Ministru.
“Ami hatama ona karta deste fulan juñu foin lalais, entaun antes tinan 2022 ne’e remata tenke rezolve preokupasaun kona-ba profesór/á kontratadu ho Voluntariu nian,” dehan Ministru Edukasaun Armindo Maia ba jornalista liu husi pres konferénsia iha MEJD Vila verde Dili, Segunda, 17/10/2022.
Armindo tenik, Lista Profesór/a Voluntariu iha Timor laran tomak ne’ebé Misteiru Edukasaun Joventude Desportu (MEJD), simu hamutuk 6000, maibé lista ne’ebé halo ona verifikasaun hamutuk 1064.
“Prosesu rekruta Profesor Voluntariu lista ne’ebé tama iha MEJD hamutuk 6.000, neste momentu 1064 mak iha ona prosesu verifikasaun no totál vaga ba Profesór voluntáriu sira hamutuk vagas 2111,” nia esplika
Armindo haktuir, Espera katak, antes fulan novembru prosesu ne’e sei remata tanba iha kategoria tolu, primeiru Grupu reklamantes hamutuk 100 resin, segundu Voluntariu iha Eskola públiku hahú husi 2007-2017 no seluk fali mak haree ba profesór ne’ebé hanorin husi 2018 mai leten liuliu ba sira ne’ebé lori matéria ezata.
“Ita mós sei haree eskola ne’ebé presiza duni profesór sira liuliu eskola ne’ebé iha área remotas maibé ami hein proposta husi eskola sira,” nia relata.
Nia afirma, iha tinan ida ne’e (2022) MEJD fo ona graduasaun grau Baserelatu ba profesór/á iha Timor-Leste hamutuk 2576.
Jornalista :Ekipa MD
Editór : Orlando Magno
