(Dili), Mudansa – Arcebispu Metropolita Dili, Primeiru Cardeal iha Timor-Leste, Dom Virgilio Cardeal da Silva do Carmo SDB. Informa, Bareta mean ne’ebé iha nia ulun la’os dekorasi de’it maibé ida ne’e responsabilidade tanba ne’e nia husu ba sarani sira atu nafatin halo orasaun.
“Bainhira amu Papa tau bareta mean ne’ebé horiseik ha’u uza hanesan sapeo iha ha’u-nia ulun, ne’e la’os dekorasi maibé ida ne’e responsabilidade boot ida mai ha’u no ba ita hotu,” dehan Dom. Virgilio Cardeal liu husi ninia omilia iha misa agradesimentu ne’ebé realiza iha Tasi tolu Dili, 06/09/2022.
Dom. Virgilio Cardeal afirma, sarani tomak ne’ebé partisipa misa agradesimentu direita no indireta karik rona hela mensajen ne’e tau iha ida-idak nia fuan tanba ida ne’e maromak nia konvite.
“Amu Papa tula buat mean iha ha’u-nia ulun no ba Cardeal sira seluk, nia dehan simu ba bareta mean ne’e halo dignidade Cardeal nian signifika ita-nia prontidaun bele halo korajen no mós presiza haburas pás iha maromak nia oin ba liberdade no progresu santa kreda nian,” Dom. Virgilio esplika.
Nia sujere, Husu ba sarani katólika hotu-hotu liuliu sarani sira iha Timor-Leste atu reza ba Dom. Virgilio ne’ebé simu knaar ida ne’e, tanba sarani sira haree jestu oioin husi média ne’ebé hatudu, maibé jestu ne’e hanesan misaun ida ba Cardeal nia.
“Bainhira simu tiha bareta mean amu Papa tau kadeli iha ha’u lima hodi dehan, simu ba kadeli ne’e husi Pedro nia liman, ha’u hatene katak ita-nia domin ba santa kreda haforsa ho domin kristu apóstolu sira nian,” Dom. Virgilio Cardeal akresenta.
Primeiru Cardeal iha Timor- Leste ne’e argumenta, hamutuk iha fatin (Tasi Tolu), ida ne’e atu agradese no reza ba ksolok hirak ne’ebé simu maromak, hakarak ksolok ne’e la bele maran no nabeen tenke reza ba malu hodi responsabilidade ba knaar ida ne’e.
“Amu Papa Francisco la’os bolu de’it ha’u mak nu’udar Cardeal maibé prezente ida ne’e fó ba ita hotu ne’ebé sai ona sarani katólika, iha oportunidade ida ba ita halibur hamutuk iha ne’e hodi fó ksolok no domin ba malu,” nia esplika.
Nia haktuir, ema hotu iha maneira oioin oinsá atu promove dame no domin iha sosiedade nia leet hodi halakon violénsia ne’ebé buras iha rai doben Timor.
Jornalista : Ekipa MD
Editór : Orlando Magno
