(Dili), Mudansa – Komandu Polísia Nasionál Timor-Leste (PNTL), munisípiu Dili Liu husi seksaun Polísia Tránzitu (POLTRANZ), konsege prende motorizada hamutuk 35 no mós parte Tránzitu fó kedas boletín ba motorista sira fila ba uma hodi selu iha Banku Nasional Ultramarinu (BNU).
Motorista sira fila husi fatin pasa revista, liman la mamuk tanba sira simu billete husi Tranzitu hodi halo tuir regulamentu ne’ebé parte Tranzitu esplika ona ba motorista sira bazeia ba lei ne’ebé vigora iha rai laran. Bainhira motorista sira kumpre regulamentu no selu ona iha Banku mak foin bele foti hikas motorizada iha Komandu Munisipiu Dili ne’ebé hetan prende husi Tranzitu sira iha portu Dili nia oin.
Motorizada hirak ne’ebé hetan prende husi Polisia Tranzitu tanba dokumentu motór la kompletu no mós motorista sira la iha karta kondusaun maibé barak liu maka asesoris motór la kompletu hanesan, lalenok motór, no Xapa Matrikula la kompletu inklui balun uza kenalpot resin.
Atividade refere, realiza iha kinta kalan durante oras tolu hahú husi tuku 20 – 23 otl, Polísia Tranzitu hala’o pasa revista iha portu Dili nia oin, situasaun kontroladu maski iha sidadaun ida-rua lakohi koopera ho parte seguransa nian.
POLTRANZ munisípiu Dili realiza atividade pasa revista bazeia ba orden husi superiór PNTL Dili tanba, antes ne’e komandante Munisipiu Dili fó ona informasaun ba membru PNTL Unidade Task Force no mós Unidade Tránzitu atu hala’o ida-idak nia servisu iha tempu kalan.
Iha atividade pasa revista ne’e seksaun Tranzitu hetan apoiu másimu husi Task Force sira ne’ebé halo seguransa ba iha atividade pasa revista hodi antisipa situasaun to’o atividade ne’e remata situasaun nafatin kontroladu.
Observasaun Jornalista Media Mudansa iha terenu katak, hafoin remata halo pasa revista Polisia Tránzitu munisípiu Dili prende motorizada hamutuk 35, bainhira remata atividade pasa revista ekipa Tranzitu no Task Force kontinua kedas lori evidénsia hirak ne’e ba iha edifísiu Komandu PNTL Munisípiu Dili ne’ebé lokaliza iha Kaikoli Dili.
Jornalista :Orlando Magno
Editór : Felisberto F. da Costa.
