(Dili), Mudansa – Iha tempu kalan, Ekipa konjunta halo operasaun la’o ain tama sai bairo iha Dili laran hodi garante pás no estabilidade iha kapitál nasaun Timor-Leste.
Atividade operasaun ne’e lidera husi Komandu PNTL munisipiu Dili ne’ebe hala’o iha Dili laran, iha sábadu kalan, 10/09/2022 hahú husi oras tuku 10:00 to’o 01:00 madrugada.
Ekipa konjunta ne’e kompostu husi, Polísia Nasionál Timor-Leste (PNTL), Batelleaun Orden Públik (BOP), Polisia Militar (PM), Unidade Maritima (UM), no mós Unidade Espesial Polisia (UEP).
Ekipa konjunta ne’e fahe ba parte haat, UEP ho PM halo operasaun iha área, mMerkadu Lama, Maskariñas, Kaikoli, Santa Crus, My Friend, China Rate Taibesi.
UPM halo operasaun husi Largo Lecidere BJ Habibi, Bidau Ospital, Bidau Masaun, Metiaut to’o Kristu Rei, no mós Ekipa Komandu Jeral PNTL halo operasaun husi Audian, Kolmera, Jardin 5 dé maiu, Motael, Farol nune’e mós ekipa ne’ebé halo operasaun iha parte Dom. Aleixo nia mak ekipa Husi Komandu PNTL munisípiu Dili hamutuk ho PNTL iha CFP.
Iha operasaun ne’e Ekipa konjunta fó hanoin ba komunidade sira la bele halibur malu iha estrada ninin bainhira kalan boot, Ekipa konjunta mós husu komunidade sira atu hakmatek iha uma.
Jornalista : Orlando Magno
Editór : Felisberto F. da Costa.
