(Dili), Mudansa – Arcebispu Metropolita Dili, Primeiru Cardeal iha Timor-Leste Dom. Virgilio Cardeal da Silva do Carmo SDB informa, tempu kleur ka lalais Papa Francisco sei to’o iha Timor-Leste, tanba nia parte komunika ona ho amu Papa.
Dom. Virgilio Cardeal da Silva do Carmo SDB. hato’o asuntu ne’e liu husi nia omilia, iha misa agradesimentu ba ne’ebé realiza iha Tasi tolu Dili, 06/09/2022.
Nia esplika, Sua Santidade Papa João Paulo II nia prezensa badak loos iha Timor no mós iha mundu nia leet maibé ninia kontribuisaun boot entaun liu tiha tinan tolunulu resin tolu Papa Saun João Paulo II mai vizita Timor maibé ohin loron sarani sira iha Timor hein hela bainhira loos mak Papa Francisco atu mai ne’e.
“Pesoalmente iha enkontru loron ikus, ha’u husu ba nia dehan, Sua Santidade Timor oan sira hein nafatin ita boot nia prezensa, maski nia susar atu hamriik maibé iha ninia kadeira roda ne’e ko’alia makaas dehan nune’e, ha’u sei ba Timor,” Dom. Virgilio Cardeal da Silva do Carmo deklara.
Dom. Virgilio Cardeal konta, Tasi tolu sai fatin maran no rai rahun tanba sarani no povu halibur malu hamutuk ba dala uluk simu Sua Santidade Papa João Paulo II ne’ebé oras ne’e hamahan an ona iha lalehan.
Jornalista : Orlando Magno
Editór : Felisberto F. da Costa.
